Menstrual tsikli stimulə edərək nizamlayır, xoşagəlməz simptomları aradan qaldırır. Aktiv immunostimulyator olduğuna görə qan dövranına təsir edir, arterial təzyiqin göstəricilərini yüksəldir. Bu şəfalı yağın dezinfeksiyaedici təsirinə görə tənəffüs sistemi xəstəliklərində də effektivdir. Və onun antiseptik təsiri iltihabi xəstəliklərdə, kiçik kəsiklərdə, yara və ekzemalarda, oynaq hərəkət sistemi, damaq xəstəliklərində də müsbət təsiri var. Kosmetologiyada problemli dərilərdə, yeniyetmələrdə olan sızanaqlarda, yağlı dəri tiplərində, selülitlərin müalicəsində, quru tip, kəpəkli saçlarda, həşərat sancmalarında işlədilir. Amma qatılmış halda istifadə olunmalıdır. Amma kəklikotu yağı fototoksik və allergik xüsusiyyətə də malikdir. Ona görə də allergik reaksiyanı yoxlamadan istifadə etmək olmaz. Neytral test zamanı belə bəzi qıcıqlanmalara hazır olmaq lazımdır. Yüksək təzyiqli xəstələrə, hamilələrə əks göstərişdir, ac qarına qəbul etmək olmaz. Aromaterapiya üçünsə 3-4 damcı kəklikotu efir yağı istifadə edilir. Fərdi aromakulonlara isə 2 damladan artıq əlavə etmək olmaz. İsti inqalyasiya zamanı 1 damcı aromayağ əlavə edilir və 7 dəqiqədən artıq qəbul etmək əks göstərişdir. Aromavannalarda qaynar su istifadə etmək və 5 damladan çox istifadə etmək olmaz. Masaj üçün isə masaj yağına 5 damcı əlavə edilir. Daxilə qəbul etdikdə isə gündə maksimum 1 damla olmaqla adi bitki yağına əlavə edilərək, şirə, kefir və hətta şərab ilə qəbul edilir. Həm də kulinariyada işlədilən bu ətirli bitki həzmi də nizamlayır. Dərmanabənzər xüsusiyyətlərə malikdir. Kəklikotu bitkisinin yarpaqları və çiçəklərindən ağız boşluğunda bakteriyalar vasitəsilə yaranan iltihab zamanı çox faydalıdır. Qalen preparatı bitkisi olaraq laringit, traxeit, bronxit, bronxo-pnevmoniyalarda bu bitki antiseptik, öskürəkəleyhinə, bəlğəmgətirici xüsusiyyətlərinə görə istifadə edilir. Dəri xəstəliklərində müalicəvi vannalar, kompresslər şəklində, mədə-bağırsaq xəstəliklərində, əsasən mədə turşuluğunun enməsi zamanı, bağırsaq spazmlarında, dezinfeksiyaedici xüsusiyyətinə görə bağırsaq mikroflorasının bərpası məqsədilə işlədilir.Açıq mənbələrə görə, kəklikotu qədimdən ilahi bir ot sayılıb, insana nəinki sağlamlığını, hətta həyatını belə geri qaytara bilməsinə inanılıb. Tərkibindəki timol qurdqovucu təsirə malikdir. “Pertussin” preparatının tərkibinə həm adi, həm də sürünən kəklikotu bitkisi daxildir. Sürünən kəklikotu ekstraktı “Bronxipret” preparatının tərkibinə daxildir və sakitləşdirici kompleks preparat olan “Passifit”in də tərkibində kəklikotu bitkisi vardır.

Müəllif: Firəngiz Rüstəmova
"TƏBABƏT VƏ MİFOLOGİYA: GÖRÜNƏN VƏ GÖRÜNMƏYƏN ƏLAQƏLƏR" kitabından