Türkiyə ilə İran arasında son dövrlər müşahidə olunan diplomatik yumşalma regionda yeni siyasi dinamikanın formalaşdığını göstərir və proses Bakıda xüsusi diqqətlə izlənilir.

Ankara-Tehran münasibətlərindəki bu hərəkətlilik Azərbaycanın regional balans siyasətinə birbaşa təsir edə biləcək amillərdən biri kimi dəyərləndirilir. Xüsusilə də hər iki ölkənin rəsmi anti-İsrail mövqeyi fonunda Bakının Təl-Əvivlə yaxın əlaqələri bir sıra suallar doğurur.

Türkiyə–İran yaxınlaşması Azərbaycan üçün narahatlıq doğuran proses kimi qəbul olunur, yoxsa bu, daha çox yeni manevr imkanları yaradır? Belə bir yaxınlaşma ölkəmizin təhlükəsizlik arxitekturasına və İsraillə əməkdaşlıq xəttinə necə təsir göstərə bilər? Cənubi Qafqazda dəyişən diplomatik mənzərə fonunda Bakı öz siyasətini hansı istiqamətdə yeniləməli və Ankara–Tehran xəttində balansı necə qorumalıdır?

Globalinfo.az-a danışan politoloq Xəyal Bəşirov deyib ki, əslində Azərbaycan dövləti bu sualların cavabını öz yanaşması ilə artıq göstərib:

“İkinci Qarabağ müharibəsindən sonra biz Cənubi Qafqaz və qonşu dövlətlərlə 3+3 formatında əməkdaşlıq təklif etmişik. Bu əməkdaşlığın gerçəkləşməsi üçün Bakı əlindən gələni edib.

Sözügedən format əslində regionda baş verən proseslərin elə region daxilində həllini hədəfləyirdi. Burada həm İran, həm də Türkiyə yer alırdı. Yəni biz bu formatı təklif ediriksə, məntiqlə Ankaranın və Tehranın yaxınlaşmasından narahat deyiliksə, bu, təbiidir. Sadəcə yanaşma söhbətin hansı yaxınlaşmadan getdiyindən asılıdır.

Məsələn, məlumat yayıldı ki, Ermənistan Avropa İttifaqı (Aİ) ilə strateji tərəfdaşlıq sazişi imzalayıb. Ermənistanın Aİ-yə yaxınlaşması da Bakını narahat edən hadisə kimi təqdim olunur. Əslində, başa düşmək lazımdır ki, bizi belə proseslər narahat etmir. Əgər bu yaxınlaşmalar Azərbaycana qarşı yönəlmirsə, heç bir narahatlıq yoxdur.

Azərbaycan regionda əməkdaşlığın tərəfdarıdır və bunun üçün ardıcıl işlər görür. Belə olan halda, iki ölkə arasında münasibətlərin yaxşılaşması Bakının maraqlarına uyğundur”.