Azərbaycanda qızıl, mis və gümüş hasilatı ilə məşğul olan “Anglo Asian Mining” (AAM) şirkəti yeni Dəmirli mədənində istehsal olunan mis konsentratının satışına başlayıb.

Globalinfo.az xəbər verir ki, bu barədə “APA-Economics”ə şirkətdən bildirilib.

Qeyd edilib ki, konsentratın satışı üzrə müqavilə 3 noyabr 2025-ci il tarixində “Trafigura Pte Ltd” şirkəti ilə imzalanıb. Müqavilə çərçivəsində 17–30 noyabr tarixlərində “Trafigura”ya 2 055 ton mis konsentratı təhvil verilib. Konsentratın tərkibində 351 ton mis olub. İlkin (provisional) ümumi satış gəliri 3,6 milyon ABŞ dolları təşkil edib. Qeyd olunan məbləğdə Azərbaycan hökumətinin payı nəzərə alınmayıb.

“Anglo Asian”dan həmçinin bildirilib ki, noyabr ayında Dəmirli mədənində rekord hasilat həcmləri əldə olunub. Ay ərzində ümumilikdə 1,95 milyon ton süxur çıxarılıb. Bunun 195 min tonu yüksək keyfiyyətli filiz, 269 min tonu oksid filiz, qalan hissəsi isə anbarların möhkəmləndirilməsi üçün istifadə edilən süxur materialı olub.
Bundan əlavə, 27 noyabr tarixində bir gündə 81 min ton süxur çıxarılması ilə şirkətin tarixində ən yüksək günlük göstəriciyə nail olunub.

Xatırladaq ki, AAM 1997-ci il avqustun 21-də imzalanan Production Sharing Agreement (PSA) tipli müqavilə çərçivəsində 6 yatağın işlənməsi fəaliyyətə başlayıb. Müqaviləyə əsasən, Azərbaycanın payı 51%, “Anglo Asian Mining PLC” şirkətinin payı isə 49% təşkil edir. Hazırda şirkət Azərbaycanda 8 müqavilə sahəsində fəaliyyət göstərmək hüququna malikdir. Şirkət London Birjasında listinqdədir və ölkənin ən iri qeyri-neft sənaye ixracatçılarından biridir.