Pion cövhəri kista, uşaqlıq boynunun müxtəlif genezli şişlərində, klimakterik və predmenstrual sindromların, öd yolları, mədə-bağırsaq sistemi xəstəliklərində həzmi və iştahanı yaxşılaşdırıcı, qastrit, kolit, xolangit, duodenit, xolesistit xəstəliklərinin müalicəsində də işlədilir.

Əks göstərişləri: əsasən 12 yaşa qədər uşaqlar, hamiləlik və süd vermə dövrü, bitkiyə qarşı konkret həssaslıq;
Mədə turşusunun artıqlığı, arterial təzyiqin aşağı olması;
Böyrək xəstəlikləri, alkoqolizm, beyin və onurğabeyni travmaları zamanı, (sürücülərə təyin edildikdə onlara sükan arxasında oturmamaq tövsiyə edilir) pion cövhəri təyin etdikdə ehtiyatlı olmaq lazımdır. Yüksək dozalarda isə zəhərlənmə verə bilər, ona görə də həkimin təyin etdiyi dozanı artırmaq olmaz.
Bolqar xalq təbabətində revmatizmin və podaqranın müalicəsində istifadə edilir. Azərbaycan xalq təbabətində isə pion anemiyalarda və tonuslandırıcı vasitə kimi işlədilir.
Pion köklərinin araqda hazırlanmış cövhəri (1:10, 5-10 damcı) mədə xəstəliklərinin, öskürəyin müalicəsində, qızdırmasalıcı vasitə, sakitləşdirici, ağrıkəsici vasitə olaraq faydalıdır. Pion köklərinin qabığı isə menstrual tsiklin nizamlanmasında effektivdir.
Magik təbabətdə pion Günəş və Ayın xərçəng bürcündə dayandığı vaxt yığılması lazımdır. Pion kökündən hazırlanmış tozu epilepsiya zamanı kvas və ya süd ilə qəbul edilir. Bitkinin ekstraktı antioksidantla zəngindir və bu səbəbdən də xərçəngönləyicidir, hepatosellyulyar karsinomasının inkişafının qarşısını alır. Pion köklərinin tərkibində olan peoniflorin iltihab əleyhinə xüsusiyyətə malikdir.
Eksperimental tədqiqatlar göstərir ki, peoniflorin süd vəzi xərçəngində terapevtik vasitə ola bilər. Klinik tədqiqatlarla təsdiq olunub ki, eroziv stomatitlərin müalicəsində lazer terapiya ilə pion qlikozidinin müştərək şəkildə istifadəsi çox effektivdir. Peoniflorinin eyni zamanda antipsoriatik aktivliyə malikdir.
Kliniki tədqiqatlara görə, pion qlikozidinin antipsoriatik preparat olan asitretin ilə yanaşı, işlədilməsi preparatın effektivliyini artırır və onun yan təsirlərini azaldır, qaraciyər toxumalarına göstərdiyi mənfi təsiri azaldır.

Müəllif: Firəngiz Rüstəmova
"FOLK VƏ YA XALQ TƏBABƏTİ" kitabından