Hacıqabulda yaşlı kişinin qadın turistə qarşı qeyri-etik hərəkətlər etdiyinə dair görüntülər hələ də müzakirə edilir. Bildirilir ki, bu davranış həm də ölkənin imicinə və turizmə zərbədir. Digər tərəfdən, bəzi taksi sürücüləri, restoranlar turistləri aldadaraq onlardan çox pul tələb edirlər. Buna görə də artıq bir çox ərəb ölkələrində “Azərbaycanda turistləri soyurlar” yanaşması yayılıb və buradan ölkəmizə səfərlər azalıb.

Bununla bağlı hansı mexanizm qurula bilər? Nələr etməliyik?

Globalinfo.az-a danışan deputat Razi Nurullayev deyib ki, Hacıqabuldakı hadisə və ümumilikdə turistlərə qarşı bəzi xoşagəlməz davranışlar artıq tək-tək fakt deyil:

“Bu, ciddi problemdir. Turizm etimada əsaslanır və bir neçə neqativ hal xaricdə sürətlə mənfi rəy yaradır. Bu gün bəzi ölkələrdə “Azərbaycanda turistləri aldadırlar” fikrinin yayılması da məhz belə halların nəticəsidir. Xüsusilə taksi sürücülərinin qiyməti şişirtməsi, restoranlarda xaricilərə fərqli və daha baha menyuların təqdim olunması bu imici zəiflədir”.

Deputat bildirib ki, bu problemi həll etmək üçün qaydalar sərtləşdirilməlidir:

“Eyni zamanda, Turizm Agentliyinə real səlahiyyətlər verilməli və nəzarət gücləndirilməlidir. Qiymətlər açıq və hamı üçün bərabər olmalıdır. Turistlərin şikayət edə biləcəyi sadə və sürətli mexanizm qurulmalıdır. Ən vacibi isə məsələyə yanaşma tərzidir. Yəni turistə qazanc mənbəyi kimi yox, ölkənin qonağı olaraq baxılmalıdır. Onun buradan apardığı təəssürat Azərbaycanın dünyadakı imicini və növbəti turist sayını müəyyən edir”.