Fransa Prezidenti Emmanuel Makron və Ukrayna Prezidenti Volodimir Zelenski yaxın günlərdə Parisdə keçiriləcək görüşdə Kiyevə SAMP/T hava hücumundan müdafiə sistemlərinin tədarükü barədə razılığa gələ bilərlər.

Publika.az xəbər verir ki, bu barədə "Reuters" vəziyyətlə tanış mənbələrə istinadla məlumat yayıb.

Agentliyin yazdığına görə, bazar ertəsi mövcud fransız ehtiyatlarından daha çox SAMP/T hava hücumundan müdafiə sistemlərinin tədarükü və ya raketlər və pilotsuz uçuş aparatlarına qarşı sistemləri də əhatə edən növbəti nəsil uzunmüddətli sifarişlər müzakirə oluna bilər.

Məlumata görə, tərəflər həmçinin on il müddətinə nəzərdə tutulan “strateji aviasiya sazişi” bağlaya bilərlər. Bu saziş Ukraynaya "Rafale" qırıcılarının verilməsini nəzərdə tutur.

Bundan əvvəl Kiyevdən aviasiya üzrə ekspert Valeri Romanenko bildirmişdi ki, Ukraynanın ballistik raketləri vurmaq üçün imkanları demək olar ki, yoxdur. O dəqiqləşdirib ki, hazırda ölkənin silahlanmasında 10-dan çox olmayan "Patriot" kompleksi və yalnız bir SAMP/T zenit-raket kompleksi var ki, o da ballistik hədəfləri məhv etməyə qadirdir.