Fransa və Ukrayna prezidentləri Emmanuel Makronla Vladimir Zelenski Parisdə keçirilən görüşdə Ukrayna üçün təhlükəsizlik zəmanətləri haqqında saziş imzalayıblar.

Publika.az xəbər verir ki, bu barədə “Euronews” məlumat yayıb.

“Bir daha vurğulamaq istərdim ki, Fransa uzunmüddətli perspektivdə Ukraynanı dəstəkləməyə davam edəcək. Bu, Ukrayna NATO-ya daxil olana qədər qüvvədə qalacaq, imzaladığımız onillik sazişin məqsədi budur”, - Emmanuel Makron bildirib.

Müqavilə çərçivəsində Paris Ukraynaya 3,24 milyard avro əlavə hərbi yardım verəcək, həmçinin Kiyevə silah göndərəcək və əsgər və zabitlərin təlimində iştirak edəcək.

Fransa prezidenti vurğulayıb ki, sazişin məqsədlərindən biri Ukrayna ordusunu NATO ilə daha da uyğunlaşdırmaq və Ukraynanı öz suverenliyini və ərazi bütövlüyünü müdafiə etməkdə davam edə bilməsi üçün ona lazım olan hər şeyi təmin etməkdir.