Günorta saatlarında özünüzü halsız və yuxulu hiss edirsinizsə, bunun səbəbi səhər yeməyi və gündəlik rejimlə bağlı ola bilər.

Publika.az xəbər verir ki, terapevt Fuonq Vo “Yahoo”ya açıqlamasında bu problemin qarşısını almaq üçün bir neçə sadə qayda təklif edib.

Onun sözlərinə görə, ilk növbədə səhər yeməyinə diqqət etmək lazımdır. Şirin dənli məhsullar, xəmir məmulatları və şirə qanda qlükozanın səviyyəsini sürətlə artırır. Bu isə insana qısa müddətlik enerji versə də, saat 14-15 radələrində qlükozanın kəskin azalmasına və yorğunluğun yaranmasına səbəb ola bilər.

Həkim həmçinin yeməkdən sonra 10-15 dəqiqəlik qısa gəzinti etməyi məsləhət görüb. Onun sözlərinə görə, hərəkət qanda qlükozanın səviyyəsini sabitləşdirməyə və orqanizmin enerji istehsalını davam etdirməsinə kömək edir.

Terapevt gün ərzində sabit rejimə əməl etməyi və yatmazdan ən azı 3 saat əvvəl qida qəbulunu dayandırmağı da tövsiyə edib. Bu qaydalar yuxunun keyfiyyətini yaxşılaşdıraraq gün ərzində enerjinin artmasına kömək edə bilər.

Fuonq Vo bildirib ki, bu tövsiyələrə bir neçə həftə ardıcıl əməl edən insan özünü daha gümrah hiss edə bilər.