Fransa Ukraynaya yeni hərbi texnika tədarük edəcək.

Publika.az xəbər verir ki, bu barədə Ukrayna Prezidenti Volodimir Zelenski fransalı həmkarı Emmanuel Makronla söhbətindən sonra məlumat verib.

"Fransa yaxın vaxtlarda Ukrayna Silahlı Qüvvələrinə tanklar və zirehli transportyorlar təhvil verəcək", - Bu barədə Ukrayna prezidenti "Twitter" səhifəsində yazıb.

"Fransa Prezidenti ilə mövcud vəziyyətlə bağlı uzun və ətraflı söhbət oldu. Ona yüngül tankların və "Bastion" zirehli transportyorlarının Ukraynaya təhvil verilməsi qərarına, eləcə də bu istiqamətdə tərəfdaşlarla işin intensivləşdirilməsinə görə təşəkkür etdim", - Zelenski qeyd edib.

Reuters agentliyi anonimlik şərti ilə jurnalistlərə açıqlama verən Yelisey sarayının nümayəndəsinə istinadla Fransa tərəfinin "AMX-10 RC" zirehli maşınlarını təhvil verəcəyi barədə məlumat yayıb.

Fransız rəsminin sözlərinə görə, prezident Emmanuel Makron Ukrayna lideri Volodimir Zelenski ilə telefon danışığı zamanı Ukraynaya hərbi texnika tədarük edəcəyinə söz verib.

"Ukrayna ordusuna dəstək üçün ilk dəfə olaraq Qərb istehsalı olan zirehli texnikalar verilir", - Yelisey sarayının nümayəndəsi bildirib.

Onun sözlərinə görə, söhbət "AMX-10 RC" zirehli maşınlarından gedir. Lakin rəsmi şəxs çatdırılma tarixi və onun həcmini açıqlamayıb.