İran-Azərbaycan Birgə Ticarət Palatasının rəhbəri elan edib ki, iranlıların Dağlıq Qarabağın işğaldan azad edilmiş ərazilərinin yenidən qurulmasında iştirakları yoxdur.

Qaynarinfo bu barədə İranın ILNA agetliyinə istinadən xəbər verir.

"Təəssüf ki, üçüncü ildir iki ölkə arasında sərhədlər bağlı qalıb", - İran-Azərbaycan Müştərək Ticarət Palatasının rəhbəri Hüseyn Pirmüəzzən "Covid"in tərəflər arasında ticarət əlaqələrinə təsirinə toxunaraq deyib.

"İLNA” xəbər agentliyinə müsahibəsində o, həmçinin deyib: "Qarabağın yenidən qurulmasında İran şirkətləri iştirak etməyib, çünki nəqliyyat olmayanda iranlılar tender, yenidənqurma kimi müzakirələrdə iştirak edə bilmirlər”.

Pirmüəzzən əlavə edib:

"Azərbaycanın müharibədən zərər çəkmiş ərazilərinin bərpasında iştirak və sərhədlərin açılması iki mühüm məsələdir ki, həllini tapmayıb, lakin başqa məsələlərdə, məsələn, yüklərin daşınması və tranziti və bazara göndərilməsi sahəsində bizim heç bir problemimiz yoxdur".

Palata rəhbəri sonda deyib:

"Avrasiya ölkələrinə ixrac imkanlarını artırmaq üçün ən mühüm həll yollarından biri güzəştli tariflər məsələsidir, təəssüf ki, biz razılığa gələ bilməmişik. Təkcə Azərbaycanla deyil, həm də Rusiya ilə. Halbuki Türkiyə bu məqsədinə nail olub və Azərbaycan və Rusiya ilə artan ixracat var".