Avokado sağlam yağlarla zəngin olmaqla yanaşı, digər tərəvəzlərdəki bəzi faydalı maddələrin orqanizm tərəfindən daha yaxşı mənimsənilməsinə kömək edə bilər. Araşdırmalar göstərir ki, avokadonun tərkibindəki yağlar karotenoidlərin, yəni antioksidant xüsusiyyətli piqmentlərin sorulmasını artırır.

Medicina.az xəbər verir ki, pomidor və kök avokado ilə xüsusilə yaxşı uyğunlaşır. Pomidordakı likopenin və kökdəki beta-karotinin mənimsənilməsi avokado ilə birlikdə qəbul edildikdə əhəmiyyətli dərəcədə arta bilər.

İspanaq, rukola və digər tünd yaşıl yarpaqlı tərəvəzlər də avokado ilə faydalı kombinasiya hesab olunur. Bu tərəvəzlərdə göz sağlamlığı üçün əhəmiyyətli olan lutein və zeaksantin kimi maddələr var.
Mütəxəssislər bildirirlər ki, bu qidaları birlikdə salat şəklində qəbul etmək həm qidalanmanı zənginləşdirir, həm də yağda həll olunan bəzi faydalı maddələrin bağırsaqlardan sorulmasını yaxşılaşdıra bilər.