Eramızın 129-199-cu illərində Kiçik Asiyanın şimal-qərbində Perqamda doğulub, imperator Adrianın hakimiyyəti dövründə Qədim Romada yaşayan Klavdi Qalen (Galenus - sakit, rahat deməkdir) həkim və yazıçı olmuşdur. Klavdi titul olaraq ona sonradan verilmişdir və mənası “şanlı, parlaq” deməkdir. İlkin təhsilini atası Nokondan alan Qalenə Aristotelin də təsiri danılmazdır. O ilk dəfə olaraq xəstəlikləri törədən faktorların olmasını, xəstəlikləri daxili və xarici olmaqla klassifikasiyaya ayırmış, anatomiya və fiziologiyanın elmi diaqnostikasının əsası olmasını, elmi diaqnostikanın, xəstəliklərin müalicə və profilaktikasının əsasını qoymuşdur.
İlk dəfə eksperimental olaraq sübut etmişdir ki, beyin maddəsini kəsərkən ağrı yaranmır, baş beyinin venalarını, aşağı boş venanı, diafraqma, qarın boşluğu orqanlarını öyrənmişdir. Sinirlərin təsvirini vermiş, müalicəvi gimnastikanı tövsiyyə etmiş, insanın temperamentlərini öyrənmiş, miqreni müalicə etmiş, ilk dəfə olaraq, dəniz dibində yaşayan elektrikli balıqlardan canlı elektrik stansiyası hazırlayaraq, həmin elektrik vasitəsilə xəstələri müalicə etmişdir.
Bunlardan əlavə bir sıra toz dərmanların, dəmləmə, cövhər, həblər, siropların, spirtlərin, yağların, plastırların, bu gün də kolkrem adlanan kosmetik kremin, liniment və məlhəmlərin reseptlərini vermişdir ki, həmin preparatlar bu gün də Qalen preparatları adlanır.
Qalen 400-dən artıq traktat yazmışdır, 200 traktatı tibbə aiddir ki, həmin yazılardan bu günə 100-ü gəlib çatmışdır. Thalamus adlanan görmə qabarlarının müəllifliyi, “phleps azygos, cremaster, peristaltikе kinеsis” terminləri də onun kimi. Qalen tibb tarixində xüsusi bir mövqe tutur ki, onun təlimləri 14 əsr ərzində, intibah dövrünə qədər sərhəd tanımadan hökm sürmüşdür.