Paris rahibləri karmelitaların melissa yarpaqlarından hazırladığı su ilə sinir xəstəliklərini müalicə edirdilər. Melissa suyunun tərkibində - nanə yarpaqları, limon qabığı, keşniş toxumu, muskat cevizi və darçın var idi.
Maqlar və cadugərlər orta əsrlərdə melissaya magik məna verirdilər. Melissa doğum sancılarını azaldan vasitənin tərkibinə daxil idi. Melissadan efir yağı ilk dəfə Almaniyada 1582-ci ildə alınıb. Rusiyada bu bitki mədə, qara ciyər, öd kisəsi xəstəliklərində susuzluğu yatıran vasitə olaraq və sinir sistemi xəstəliklərinin müalicəsində işlədilirdi.
Bioloji aktiv əlavələrin tərkibinə daxil olan melissa bitkisi həm də menstrual tsiklin pozulmalarında da faydalıdır. Limon ətri və dadı verən melissa Avropa və Amerika mətbəxində ədviyyat kimi işlədilir.Xoş ətirli dərman bitkisi olan melissanı limonlu və arı nanəsi də adlandırırlar. Aralıq dənizinin şərq sahilləri, Balkanlar, İran melissanın vətəni hesab edilə bilər. Bu gözəl ətirli bitkini tanımayan biri spesifik ətrinə görə onu tapa bilər. Bu bitkinin yarpaqları limon ətri verir və elə buna görə də onu limonlu nanə də adlandırırlar. Çiçəkləmə dövründə isə onun ətri daha təravətli olur.
Melissa qədim yunan dilində arı deməkdir və antik miflərdə onun haqqında bir sıra məlumatlar vardır:
1. Krit çarı Melisseyin nimfa Amalfeyadan olan qızıdır. Kallimaxa görə Melissa Zeusu bal ilə qidalandırıb.
2. Nəsli Arıdan gələn İlliriya nimfasıdır. Vizantiyalı Stefana görə, Melissa Epidamnın qızıdır, Diraxiyanın anasıdır (atası isə Poseydondur).
3. Demetranın İstmadakı kahinəsi qonşusuna məhsuldarlıq tanrıçasının sirrini açmamışdı, Demetra isə təqsirkarı məhv etmişdi və Melissanın ölmüş olduğu yerdə arı yaranmışdı.

Müəllif: Firəngiz Rüstəmova
"TƏBABƏT VƏ MİFOLOGİYA: GÖRÜNƏN VƏ GÖRÜNMƏYƏN ƏLAQƏLƏR" kitabından