Əfsanəyə görə, efir yağları ilə zəngin olan, gözəl ətirli nanənin adı (latın d. Mentha) nimfa Mentanın adından götürülüb. Dağların tanrıçası Menta yeraltı dünyanın, çarlığının tanrısı Aidin sevimlisi olub, daha sonra xanımı Persefona onu ətirli bir nanə bitkisinə çevirib.
Nanə iştahanı artırır, həzmi yaxşılaşdırır, ürəkbulanmanı aradan qaldırır, eyni zamanda, ödqovucudur, yuxarı tənəffüs yollarının iltihabi xəstəliklərində, ağciyər və ürək-damar xəstəliklərində, ginekoloji qanaxmalarda digər bitkilərlə yanaşı təyin edilir.
Nanə hazır dərman preparatlarının tərkibində:
-Fitosedan №2 (Sakitləşdirici №2)
-Persen SANDOZ (Sloveniya)
EVALAR:
-Fitoqastrol (Mədə-bağırsaq yığımı)
-Fitohepatol (Ödqovucu yığım №3)
-Fitonefrol ® (Uroloji yığım)
-Sakitləşdirici yığım №2
-Stomatofit - PHYTOPHARM KLEKA (Polşa)
Azərbaycanda bəlkə də elə bir insan və ya ailə yoxdur ki, nanənin şəfaverici xüsusiyyətlərindən xəbərdar olmasın və onun istər təzəsindən, istərsə də qurudulmuş yarpaqlarından həm müalicə vasitəsi kimi, həm də kulinariyada istifadə etməsin. Nanə yarpaqlarından sakitləşdirici kimi, menstrual ağrılarda, bağırsaqların spazmında, ürəkbulanmalarda, köp, ishal zamanı müalicə vasitəsi olaraq istifadə edilir. Çaylara ətirli, dadverici və xeyirli təbii vasitə olaraq, dovğa, yarpaq dolması və digər yeməklərə isə (kulinariyamızda) vacib bir milli kom-ponent olaraq əlavə edilir.

Müəllif: Firəngiz Rüstəmova
"TƏBABƏT VƏ MİFOLOGİYA: GÖRÜNƏN VƏ GÖRÜNMƏYƏN ƏLAQƏLƏR" kitabından