Harmoniya – Yunan mifologiyasında, razılıq, vəhdət və xoşbəxt nigahın tanrıçasıdır. Müharibə tanrısı Ares ilə gözəllik, sevgi ilahəsi Afroditanın qızı və qəhrəman Kadmın xanımıdır. Kadm ilə Harmoniyanın toyunda bütün Olimp tanrıları iştirak etmişdi. Apollon kiçik arfaya bənzər musiqi aləti olan kifarada, Muzalar qaboya bənzər avlosda ifa etmişdi. Hermes Harmoniyaya lira hədiyyə etmişdi, Afina boyunbağı, qolsuz üst geyimi peplos və avlos hədiyyə etmişdi. Demetra taxıl məhsulları, Elektra isə zərb alətləri olan kimvallarla və timpanlarla ifa edilən müqəddəs ayinlər hədiyyə etmişdi ona. Bu hədiyyələrdən isə diqqəti cəlb edən və Harmoniya boyunbağısı adlanan həmin boyunbağı oldu. Hansı ki, lənətlənmiş olan boyunbağı Afroditanın bütün nəslinə bədbəxtlik gətirdi. Sonradan lənətlənərək ilana çevrilmiş Kadmı görən Harmoniya çaşqınlıq içərisində əynindəki paltarlarını cırıb atdı və Kadmı yanına çağırdı. İlana çevrilmiş Kadm onu sararaq oxşadı. Sonra Harmoniya tanrılardan xahiş etdi ki, onu da ilana çevirsinlər. Tanrılar Harmoniyanın arzusunu nəzərə aldılar. Həmin vaxtdan ilanların bir – birinə sarılaraq göstərdikləri qeyri adi sevgi rəqsi görənləri heyran edir.