Azərbaycan millisinin qapıçısı Emil Balayev yenidən legioner həyatı yaşaya bilər.

Ailehekimiklinikasi.az Oxu.Az-a istinadən xəbər verir ki, “Səbail”in qolkiperi Türkiyə Superliqa klubunun maraq dairəsinə düşüb.

Belə ki, “Qarabağ”ın sabiq qapıçısı İbrahim Şehiçdən əlini üzən “Ərzurumspor” indi də Balayevə “elçi düşüb”. Uzun fasilədən sonra Superliqada iştirak hüququ qazanan ərzurumlular çərçivə üçün millimizin üzvünü düşünüb.

Türklərin “azəri Buffon” ləqəbi ilə təqdim etdikləri Emilin transfer qiyməti də Superliqa debütantını qane edir. Belə ki, 24 yaşlı qolkiperin 500-600 min avro müqabilində transferinin mümkünlüyü vurğulanıb.

Balayevin “Səbail”dən ayrılmaq qərarına gəldiyi, buna görə keçidin daha ucuz qiymətə baş tutma ehtimalının olduğu qeyd olunur.

Həmçinin İtaliyanın riverflash.it saytı da azərbaycanlı qapıçı ilə bağlı məlumat yayıb. Bu saytın iddiasına görə, İtaliya A Seriyası klublarından “Roma” və “Udineze” Emil Balayevi heyətində görmək istəyir.

Bu məsələ ilə bağlı Emil Balayevlə əlaqə saxladıq. Lakin o bunlardan xəbərsiz olduğunu dedi:

“Mənim hələ “Səbail”lə bir illik müqaviləm var. Ancaq belə klublardan mənə konkret müraciət olmayıb. Təbii ki, xaricdən sərfəli təklif gələrsə, bunu dəyərləndirməyə çalışaram”.

Qeyd edək ki, Emil Balayev 2015/16 mövsümünü Almaniyanın “Ayntraxt” (Frankfurt) klubunda keçirərək, ilk dəfə legioner həyatı yaşayıb.