2026-cı ilin dövlət büdcəsində “Azərlayt” neftinin bir barreli 65 dollar hesablanıb. Amma dünya bazarında neftin qiymətinin sürətlə ucuzlaşması bu proqnozları sual altına salıb.

Qiymət enişi müvəqqətidirmi, yaxın zamanda dayana və yenidən bahalaşa bilərmi? Neftin dəyər itirdiyi bir vaxtda hökumətin hansı “B planı” var?

Globalinfo.az-a danışan iqtisadçı Elçin Rəşidov deyib ki, neftin dünya bazarında ucuzlaşması təklifin tələbi üstələməsi fonunda baş verir:

“Son dövrlərdə qlobal xam neft hasilatı artıb, lakin iqtisadi aktivlik zəif olduğu üçün tələbat azalır. Bu iki amil qiymətlərin enməsinə səbəb olur. Qabaqcıl maliyyə institutları qiymətlərin uzunmüddətli dövrdə aşağı qala biləcəyini, hətta 50, bəzi proqnozlara görə isə, 30 dolların altına düşə biləcəyini bildirirlər. Gələcəkdə geosiyasi risklər və ya istehsalçı ölkələrdə təklifin məhdudlaşması qiymətlərin yüksəlməsinə səbəb ola bilər. Hazırda isə qiymətlərin enməsində əsas rol oynayan amillərdən biri OPEC+ ölkələrində intizamın zəifləməsidir. Bir sıra ölkələr razılaşdırılmış kvotalara əməl etmir. Bununla yanaşı, ABŞ-da şist neftinin hasilatı artır və nəticədə bazara böyük həcmdə əlavə neft çıxır. İran və Venesuelanın sanksiyaların qismən yumşalması fonunda bazara qayıtması da, qlobal təklifi yüksəldən digər mühüm faktordur.

Digər tərəfdən, dünya iqtisadi artımı zəifdir. Çində dinamika əvvəlki illərlə müqayisədə xeyli aşağı düşüb, Avropa isə geriləmə mərhələsindədir. Bu da enerji tələbatını azaldır. Avropada bərpa olunan enerji mənbələrinə keçidin sürətlənməsi və elektrik nəqliyyat vasitələrinin genişlənməsi də neft ilə qaz kimi qeyri-bərpa olunan enerji resurslarına ehtiyacı aşağı salır. Bütün bu amillər qiymətlərin enməsi ilə nəticələnir. Qiymətlərin bərpası üçün əsas şərt təklifin azaldılması və ya istehsalda məhdudiyyətlərin yaranmasıdır. Bu da yalnız müəyyən geosiyasi hadisələr baş verdikdə mümkündür”.

İqtisadçı qeyd edib ki, növbəti il üçün Azərbaycanın dövlət büdcəsi artıq formalaşdırılıb və ciddi risk görünmür:

“Neftin qiymətində dəyişikliklər vergilər vasitəsilə büdcəyə yalnız cüzi təsir göstərir. Lakin qiymətlərin düşməsi Dövlət Neft Fondunun gəlirlərini azaldır və bu, gələcək illərdə büdcəyə edilən transferlərin azalmasına səbəb olacaq. Həm neftin qiymətinin, həm də hasilatın aşağı düşməsi 2026-cı ildən sonra dövlətin investisiya və sosial proqramlarını tam həcmdə həyata keçirməsini çətinləşdirə bilər. Büdcədən əhaliyə yönələn vəsaitin azalmasının ümumi iqtisadi aktivliyə, əmlak bazarına və əhalinin gəlirlərinə də mənfi təsirləri mümkündür.

Ekspertin sözlərinə görə, “hökumətin B planı” dedikdə alternativ strategiya nəzərdə tutulur:

“Lakin istənilən strategiyanın əsasında effektiv maliyyə idarəetməsi dayanmalıdır. Hazırda bu sahədə səmərəlilik aşağıdır. Çünki idarəetmə pərakəndə, qeyri-şəffaflıq yüksək və maliyyə intizamı zəifdir. Bu səbəbdən də effektiv hər hansı bir model qurmaq olmur. Ona görə də ölkə iqtisadiyyatı üçün səmərəli maliyyə idarəetməsi qeyri-mümkündür. İllər ərzində əldə olunan neft gəlirlərinin böyük hissəsinin böyük bir hissəsi israf edilib. Bu da mövcud problemləri daha da dərinləşdirib. Vəziyyətdən çıxış yolu strategiyadan əvvəl “yaxşı maliyyə idarəetməsi” adlanan terminin tətbiqidir. Hesab edirəm ki, hökumətin “B planı” yoxdur, yalnız dediyim bünövrənin əsasında real “B planının” formalaşdırılması mümkündür”.