Son illərdə boyun ağrısı, baş gicəllənməsi, göz qaralması və “başım dumanlıdır” şikayətləri ilə həkimə müraciət edənlərin sayı artır. Bir çox insan bunun səbəbinin sadəcə yorğunluq və ya stress olduğunu düşünür. Halbuki səbəb boyun osteoxondrozu ola bilər.

Medicina.az xəbər verir ki, boyun osteoxondrozu təkcə boyun ağrısı yaratmır. Bu problem beyinə gedən qan dövranına, sinirlərə və sinir sisteminə də ciddi təsir göstərə bilir.

Boyun osteoxondrozu nədir?

Boyun fəqərələri arasında yerləşən disklərin zəifləməsi, sürtülməsi və formasının dəyişməsi osteoxondroz adlanır.
Ən çox: — uzun telefon istifadəsi, — kompüter qarşısında saatlarla oturmaq, — stress, — hərəkətsizlik, — yanlış yastıq, — əzələ spazmları səbəbindən yaranır.

Boyunda olan dəyişikliklər zamanla damarları və sinirləri sıxmağa başlayır.

Boyun nahiyəsindən beyinə gedən çox vacib damarlar keçir. Osteoxondroz zamanı bu damarlar sıxıla bilər və beyinə gedən qan azalır.

Nəticədə beyində oksigen çatışmazlığı yaranmağa başlayır.

Ən çox görülən əlamətlər:

— Baş gicəllənməsi
— Başda ağırlıq hissi
— Göz qaralması
— Unutqanlıq
— Beyin dumanı hissi
— Tez yorulmaq
— Qulaqda küy
— Panikaya bənzər hallar
— Ürək döyüntüsü
— Boyundan başa yayılan ağrılar
— Migrenə bənzər tutmalar
— Diqqət pozğunluğu
— Yuxu problemləri

Bəzi insanlarda bu hallar o qədər güclü olur ki, onlar ürək, təzyiq və ya nevroloji xəstəlikdən şübhələnirlər.

Niyə panik ataka bənzəyir?

Boyun nahiyəsində çoxlu sinir ucları yerləşir.

Əzələlər sıxıldıqda və qan dövranı zəiflədikdə sinir sistemi daim “təhlükə siqnalı” almağa başlayır. Buna görə: — nəfəs çatmırmış kimi hiss, — qəfil qorxu, — iç sıxılması, — əllərdə keyimə, — baş boşalması hissi yarana bilər.

Bir çox hallarda insan panik atak müalicəsi alır, amma əsas səbəb boyun problemindən qaynaqlanır.

Kimlər risk altındadır?

— Gün boyu telefon istifadə edənlər
— Kompüter qarşısında işləyənlər
— Stressli insanlar
— Az hərəkət edənlər
— Yüksək yastıqda yatanlar
— Boyun əzələləri daim gərgin olanlar

Nə etmək lazımdır?

— Uzun müddət başı aşağı tutmamaq
— Telefonu göz səviyyəsində istifadə etmək
— Boyun hərəkətləri və yüngül gimnastika etmək
— Ortopedik yastıq istifadə etmək
— Uzun oturarkən fasilələr vermək
— Maqnezium və D vitamini səviyyəsini yoxlatdırmaq
— Nevroloq və ya vertebroloqa müraciət etmək

Əgər boyun osteoxondrozu vaxtında nəzarətə alınmasa, uzunmüddətli baş ağrıları, xroniki yorğunluq və sinir sistemi problemlərinə səbəb ola bilər.