Laçın rayonunun tarixi kəndlərindən olan Zabux artıq Azərbaycana təhvil verilmək üzrədir.

Qalanews xəbər verir ki, Ermənistan mətbuatı artıq iki gündür ki, işğaldan sonra burada məskunlaşdırılmış ermənilərin köç prosesinin başlamasını əks etdirən foto və videolar yayır. Ənənəvi xislətlərinə sadiq qalan ermənilər "tarixi" torpaqlarından uzaqlaşdırıldıqlarını iddia edirlər. Amma məsələnin maraqlı və diqqət çəkən tərəfi isə odur ki, elə yerli sakinlərin özləri yalanlarını ifşa edərək əslində bura sonradan köçürüldüklərini deyirlər.

Məsələn, rejissor Hovannes İşxanyan bölgədən çəkilmiş bir videonu paylaşaraq kəndin artıq rəsmi Bakının nəzarətinə keçdiyini qeyd edib. Erməni rejissor müsahibin bu əraziyə sonradan gəldiyini də istəmədən etiraf edib.

“Gördüyünüz şəxs Zabuxdan olan Armen Barseqyandır. O, 1994-cü ildən bu kənddə yaşayır. Onlar bütün çətinliklərin öhdəsindən gəlib xoşbəxt həyata nail olublar. İndi bu adamlara deyirlər ki, tez bir zamanda evinizi tərk edin ki, kənd qarşı tərəfə təhvil verilsin”.
Həmin şəxs isə çıxışında deyir: “Bizə deyirlər ki, heç nəyə toxunmayın, bir müddət sonra qayıda bilərsiniz. Cavab verirəm ki, sən bundan sonra hansı silahı götürəcəksən ki, qayıdıb gəlib yenə kəndi ala bilək?”

Paylaşıma şərh yazan ermənilər görüntülərdəki yeşiklərin silah yeşiyi olub-olmamasını soruşublar. Cavab isə "Hə" olub. Bu cür görüntülər isə özlərini sülhpərvər, dinc sakin adlandıran, tarixi torpaqlarımıza son 30 ildə köçürülmüş ermənilərin əslində əsl mahiyyətini açıb göstərir.