Luqansk vilayətinin başçısı Sergey Qayday Luqansk vilayətinin ərazisinin 80%-nin Rusiyanın nəzarətində olduğunu bildirib.

Publika.az xəbər verir ki, o, bu barədə CNN-ə açıqlamasında bildirib.

Qayday qeyd edib ki, Rusiya, əlbəttə ki, bununla dayanmayacaq və irəliləyəcək:

"Bizim burada çox ciddi vəziyyətimiz var. Luqansk vilayətinin bütün ərazisi atəşə tutulur. Təhlükəsiz şəhər yoxdur... Biz başa düşürük ki, Rusiya irəliləyir və yolunda olan hər şeyi məhv etmək niyyətindədir. Ona görə də biz mümkün olduğu qədər hamını təxliyə etməyə çalışırıq”.

Qaydai döyüşlərin şiddətləndiyi bir vaxtda dinc sakinləri Ukraynanın şərq bölgəsini tərk etməyə çağırıb. Onun sözlərinə görə, müharibədən əvvəl Luqansk vilayətində yaşayan 350 min nəfərdən bu gün təxminən 70 mini qalıb.

Müharibənin sonunu necə gördüyünü soruşduqda, Qayday hərbi əməliyyatların dayandırılmasının çox güman ki, siyasi razılaşma ilə bağlı olduğunu deyib, lakin əlavə edib ki, ruslara güvənməyin çətin olduğunu düşünür.