"Ukraynanın şərqində atışma səsləri eşidilir. Donbassdan güclü artilleriya atəşi Ukraynanın Luqansk şəhərinə çatdığı xəbərləri də doğrudur. Amma bu, müharibənin başladığı anlamına gəlmir. Çünkü müharibə 2014-cü ildən davam edir".

Bunu Milli.Az-a açıqlamasında Kiyev Dünya Siyasət İnstitutunun dosenti, politoloq Yevqeni Maqda deyib.

Ukraynalı siyasi analitik bildirib ki, Rusiya Ukraynanı təxribata çəkir:

"Hazırda baş verənlər isə Rusiyanın Ukraynanı böyük hərbi qarşıdurmaya çəkib, işğal etməsi üçün təxribatıdır. Rusiyanın Ukraynaya hücumu və ya fevralın 20-də mümkün hücum xəbəri ilə bağlı məlumatların sürətlə yayılması da spekulyasiyadır.

8 il əvvəl Rusiya ilə başlayan savaşımızın bundan daha aktiv fazaya keçəcəyinə əmin deyiləm. Donbassdan Luqansk şəhərinin ağır artilleriyadan atəşə tutulması sadəcə təxribatdır.

Ukrayna Kremlin bu təxribatına getməməlidir, getməyəcək də".

Qeyd edək ki, "Reuters"ün məlumatına görə Ukraynanın şərqində atəş səsləri eşidilib. Ukraynanın xarici işlər naziri Kuleba faktı təsdiqləyib: "Donbassdan ağır artilleriya atəşi Ukraynanın Luqansk şəhərciyinə çatıb".

Onu da əlavə edək ki, 2014-cü ildən Donbasdakı münaqişəni işıqlandıran amerikalı hərbi jurnalist Nolan Peterson bildirib ki, ötən gecə Ukrayna Silahlı Qüvvələri tam döyüş hazırlığında olub, indi isə Rusiyanın hücumu üçün müdafiəyə hazırlaşırlar.