Hamiləlik zamanı istifadə olunan USM-nin ana bətnindəki dölə əks təsirinin olmadığı çox saylı elmi tətqiqatlarla sübut olunmuşdur.
Hamiləlik zamanı ilk USM aybaşı gecikməsindən 2 həftə sonra dölün yerini müəyyən etmək, yəni uşaqlıq daxili vəya uşaqlıqdan kənar hamiləliyi təyin etmək məqsədilə, həm də ürək vurğularını, qan dövranını ilkin olaraq izləmək üçün aparılır. Hamiləlik uşaqlıq daxilində olarsa qadın hamiləliyinin izlənmasi üçün qeydiyyata alınır. Əks halda, uşaqlıqdan kənar hamiləlik aşkarlanarsa qadın ciddi nəzarətdə olmaq şərti ilə, müvafiq müayinələrdən sonra lazım gələrsə medikamentoz müalicəyə, lazım gələrsə isə cərrahi müdaxiləyə cəlb olunur.
Hamiləlik zamanı əsas 3 dəfə olmaqla skrininq USM aparılır.
I. Hamiləliyin 11-14-cü həftəsində təyin edilir. Bu zaman dölün sonuncu aybaşıya nisbətdə hamiləlik həftəsi dəqiq müəyyənləşdirilir. Burun sümüyünün mövcudluğuna, ölçülərinə xüsusi diqqət ayrılır. Yaxa nahiyyəsi (NT) adlanan sahəyə xüsusi diqqət ayrılaraq ölçülür. Bu parametrlərdə olan dəyişikliklər döldə ola biləcək xromosom anomaliyalarından xəbər verir.
II. Normal hamiləlik zamanı ikinci USM müayinəsi hamiləliyin 20-24-cü həftəsində təyin edilir. Dölün bütün daxili orqanları detallı müayinə edilir, başında və onurğa beynində patologiyanın olub olmaması araşdırılır. Göbək ciyəsi arteriyasında, uşaqlıq arteriyalarında, dölün orta beyin arteriyasında olan qanın axını doplerometriya müayinəsi ilə ölçülür. Aşkarlanmış olan hər hansı dəyişikliklər olarasa ginekoloq tərəfindən müvafiq müalicə təyin olunur.
III. USM müayinəsi 31-34-cü həftələrdə edilir. Bu zaman dölün ana bətnindəki mövqeyi, görkəmi, dölyanı mayenin miqdarı, göbək ciyəsinin dölün boynuna dolanma olub olmaması, ciftin qalınlığı və strukturu ətraflı müayinə edilir.
Doğumdan əvvəlki dövrdə; hamiləliyin 37-38 həftəsində USM təkrar aparılması məsləhətdir. Bu zaman dölün uşaqlıq daxilində vəziyyəti, gələcək hissəsinin baş, sağrı, ayaqlar və s. olmasının dəqiqləşdirilməsi, dölün təqribi çəkisini təyin etmək vacibdir. USM zamanı dölün çəkisinin təyinində 200-250qr yanılma ehtimalı vardır. Göbək ciyəsinin dölün boynuna dolanıb dolanmaması və digər göstəricilər ətraflı müayinə olunur ki, doğum həkimi də bu göstəricilərə və digər kliniki analizlərə, hamilənin anamnezinə əsasən doğum taktikasını təyin edir.
Ailə həkimi klinikası F. Rüstəmova