Reyhan selikli qişaları qıcıqlandırdığına görə çox istifadə etmək olmaz. Bu bitkini müalicə vasitəsi kimi qəbul etmək istəyən insan həkim ilə məsləhətləşməlidir. Reyhan yağı isə yüksək dozalarda daha çox təhlükə yarada bilər. Belə ki, zəhərlənmələr, allergiya əmələ gəlməsi, letal nəticə verməsi mümkündür. Ürək-damar sistemi xəstələrinin, hamilələrin, qanında qatılaşma olan, tromblu xəstələrin reyhan yağı (reyhan bitkisi) qəbul etməsi məsləhət deyildir.
70-dən artıq növü olan reyhan bitkisi arterial təzyiqi nizamlayır (endirir), ümumi vəziyyəti yaxşılaşdırır, damaq qanamalarını aradan qaldırır, pnevmoniya və bronxitlərdə faydalıdır, göbələk əleyhinə təsirə malikdir. Dünya ölkələrinin əksəriyyətində bu gözəl ətirli bitki kulinariyada istifadə edilir.
Əbu Əli İbn Sinanın, Əbu Reyhan Biruninin və digər müəlliflər reyhanın müalicəvi xüsusiyyətləri haqqında yazılarda göstərirlər ki, reyhan yemək beyin və burun tıxanıqlığını açır, daxili orqanların şişlərini əridir, istənilən baş ağrısını kəsir, melanxoliyanı, mədə narahatlığını, ürək döyüntülərini nizamlayır, çürümüş qazları qovur.
Reyhan ətri ilə nəfəs almaq beyinə güc verir, abstensiyanı, sərxoşluğu dayandırır, zökəm zamanı faydalıdır, vəba xəstəliyinin yayılmasının qarşısını alır. Reyhan yemək selik və qara ödün ürəyə yığılması zamanı yaranan ritm pozuntularında xeyirlidir, əqrəb və onun zəhəri insana ziyan verə bilmir, hətta o sancmanın ağrısını hiss etmir.

Müəllif: Firəngiz Rüstəmova
"TƏBABƏT VƏ MİFOLOGİYA: GÖRÜNƏN VƏ GÖRÜNMƏYƏN ƏLAQƏLƏR" kitabından