Danimarkanın “Saxo Bank” bankı 2026-cı il üçün şokedici proqnozlar yayımlayıb. Bildirilib ki, qızılın qiyməti 10 min ABŞ dollarına qədər yüksələ, o cümlədən kriptovalyutalar və ABŞ dolları çöküş yaşaya bilər.

Bu, nə dərəcədə əsaslı ola bilər?

Globalinfo.az-a danışan iqtisadçı Turab Rzayev deyib ki, “Saxo Bank”ın proqnozları çox vaxt real iqtisadi təhlil yox, şou-biznes xarakterli yanaşma kimi qiymətləndirilir:

“Adətən təsiri böyük, lakin reallaşma ehtimalı aşağı olan ssenarilər təqdim edilir. Lakin “Saxo Bank”ın bəzi açıqlamaları zamanla özünü doğruldub. Məsələn, Brexit, qızılın qiymətinin 3000 dolları keçməsi, eləcə də kriptovalyutaların bahalaşması kimi bir sıra proqnozlar sonradan təsdiqini tapıb. Bəziləri gec reallaşsa da, nəticədə baş verib. Buna görə də dünya ictimaiyyəti, xüsusilə iqtisadi dairələr “Saxo Bank”ın illik proqnozlarına həm əyləncə, həm də müəyyən mənada mümkün iqtisadi ssenarilərin təhlili kimi baxır”.

İqtisadçı qeyd edib ki, bu il irəli sürülən proqnozlar arasında qızılın rekord dərəcədə bahalaşması və yuanın ABŞ dollarını üstələməsi kimi fikirlər də var:

“Dolların dünya miqyasında dəyər itirdiyi məlumdur, lakin hazırda yuanın dollar qarşısında ciddi möhkəmlənməsi müşahidə edilmir. Qızılın bahalaşması isə daha real görünür, çünki dünyanın bir çox mərkəzi bankları aktiv şəkildə qızıl ehtiyatlarını artırır. Bu da qiymət artımını stimullaşdıra bilər. Ümumilikdə, “Saxo Bank”ın bütün proqnozlarının həyata keçməsi gözlənilmir. Lakin yayılan məlumatlar gələcək qlobal iqtisadi mənzərə barədə müəyyən istiqamət və ümumi təsəvvür formalaşdırması baxımından əhəmiyyətlidir”.