Şirin bəy Kəsəmənli və həyat yoldaşı Qeysər Kaşıyeva
Kəsəmənli Şirin bəy Cəfər oğlu; hərbi xadim, Azərbaycan Xalq Cümhuriyyəti ordusunun zabiti, polkovnik.
Kəsəmənli Şirin bəy Cəfər oğlu 1887-ci ildə Qazax qəzasının Qıraq Kəsəmən kəndində anadan olmuşdur.
Tiflisdə hərbi gimnaziyada təhsil almışdır. Gimnaziyanı 1905- ci ildə bitirdikdən sonra Qusar alayında qulluq etmiş, Kiyevdə ikinci Konstantin topçu məktəbində hərbi təhsilini davam etdirmişdir. 1914-18 –ci il birinci dünya müharibəsində “Dikaya diviziya”nın tərkibində vuruşmuş, “İgidliyə görə” medal və 4-cü dərəcəli “Müqəddəs Georgi” ordeni ilə təltif olunmuşdur.
Azərbaycan Xalq Cümhuriyyəti elan olunduqdan sonra Şirin bəy Kəsəmənli Milli orduda xidmətə başlamışdır. O, ölkəmizə soxulmuş ingilis generalı Tomsonun və erməni daşnaklarının işğalçı qüvvələrinə qarşı Qarabağda, Zəngəzurda və Qazaxda bir sıra uğurlu əməliyyatlarda iştirak etmiş və türk hərbi qüvvələri Azərbaycanı tərk etdikdən sonra Praporşiklər məktəbinin ilk azərbaycanlı rəisi olmuşdur.
Hərbi nazirin 1919-ci il 8 aprel tarixli əmri ilə 2-ci Bakı piyada alayı (sonralar 4-cü Quba piyada alayı adlandırılmışdı) komandiri təyin edilmişdi. Şimal sərhədlərinin müdafiəsi üçün yaradılmış Xaçmaz dəstəsinə rəhbərlik də Şirin bəy Kəsəmənliyə həvalə olunmuşdu. Vəzifə başında ağır xəstəliyə tutulan Şirin bəy Kəsəmənli 1919-ci il sentyabnn 29-da müalicə üçün Tiflisə göndərilmiş, hələ müalicədə ikən hərbi nazirin 1919-ci il 7 dekabr tarixli əmri ilə 2-ci piyada diviziyası komandirinin müavini təyin edilmişdi. Polkovnik Şirin bəy Kəsəmənski 1920-ci il 4 yanvarda Tiflisdə müalicə aldığı xəstəxanada vəfat etmiş və Qazaxda dəfn olunmuşdur.
Qeysər Kaşıyeva
Qeysər Kaşıyeva (1893-1972) Azərbaycanda təhsil görmüş ilk rəssam qadın olmuşdur. Tiflisdə rəssamlıq məktəbini bitirmişdir (1906).