Qırqovul - Kolxidadakı Fazis çayının adı ilə əlaqədar Fazan adlanan bu gözəl quş Yunanıstana arqonavt Yason tərəfindən gətirilib. Yason Kolxidaya qızıl dəri ardınca getmişdi. Zeytun bağlarında, xramların ətrafında yaşayayaraq çoxalan, aristokratları məftun edən qırqovul bütün avropaya yayılıb. Qırqovul quşu haqqında Gürcüstanın paytaxtı Tiflis şəhərinin əfsanəsi var. Kartli çarı Vaxtanq Qorqasali ova çıxarkən səmaya bir qırqovul, bir də qırğı quşu uçururlar. Amma bu quşlar gözdən itir. Quşları axtaran çar Qorqasal onları yerdən qaynayan isti su bulağında tapır. Çar həmin ərazini o qədər bəyənir ki, orada şəhər salmaq qərarına gəlir. Qorqasal tərəfindən Tiflis -Tfilisi– Tbilisi salınır həmin yerdə. Tfili sözü gürcü dilində isti deməkdir. Bu gün hər iki quşun təsviri Tiflis şəhərinin gerbində həkk edilib. Hind tovuz quşu ilə Çin qırqovulu eyni ailəyə mənsub olan quşlardır. Əfsanəvi Feniks quşunun təsvirlərinin yaranmasında qırqovulun rəngarəng lələklərinin, ekzotik gözəlliyinin təsiri olub. Qırqovul günəşlə, işıqla, ləyaqətlə assosiasiya olunur. Qırqovul uçarkən qanadlarını bərk çırpıb gurultu saldığına görə Çində onu ildırımın simvolu hesab edirlər. Yaponiyada qırqovul Böyük tanrıça, Günəş tanrıçası Amatersunun elçisi sayılır.
“Hor sivilizasiyası və onun günümüzdə izləri” kitabından. F. Rüstəmova