“Fevralın 17-də Cenevrədə Rusiya–ABŞ-Ukrayna danışıqlarının növbəti mərhələsinə başlanıldı. ABŞ, Konqresə aralıq seçkilərdən əvvəl Ukraynada sülhə nail olmaq niyyətindədir. Buna görə də Vaşinqton münaqişənin hər iki tərəfinə təzyiq göstərməyə çalışır”.

Bu sözləri Globalinfo.az-a politoloq Bakir Həsənbəyli deyib.

Politoloq bildirib ki, Ağ Evin danışıqların bugünkü raundunda məqsədinə nail olması ilə bağlı proqnoz vermək absurddur:

“ABŞ yayın əvvəlinə qədər hərbi əməliyyatların aktiv mərhələsinə son qoymaqda israrlıdırlar. Hətta müvafiq tədbirlər üçün cədvəl də tələb edirlər. Doğrudur, hələlik cədvəldə nələrin nəzərdə tutulduğu məlum deyil. Ancaq sülhə keçid üçün bir növ mərhələli plandan söhbət getdiyi güman olunur. Lakin ABŞ Dövlət katibi Marko Rubionun təbirincə desək, danışıqlarda sıçrayış baş verməyəcək.

İndiki məqamda əldə olunacaq ən böyük nailiyyət isə əsir mübadiləsi olacaq. ABŞ-da Prezident Donald Tramp administrasiyası aralıq Konqres seçkilərinə hazırlıqlara artıq başlayıb. Respublikaçılar seçkiləri uduzmamaq üçün var gücləri ilə çalışırlar. Ukrayna böhranının tənzimlənməsi çərçivəsində mübahisəli məsələlərin sayının xeyli azalması iddia olunsa da, problemin ən çətin məqamları hələ də qalmaqdadır. Söhbət ərazi məsələsi və Ukraynanın Qərbdən almaq istədiyi təhlükəsizlik təminatlarından gedir. Təhlükəsizlik məsələləri üzrə işçi qrupu mövqelərin sinxronlaşdırılması mərhələsinə keçib.

Həllini tapmalı olan əsas prinsipial məsələlərə Donbasın statusu və Ukraynanın təhlükəsizlik təminatları daxildir. Lakin bu istiqamətdə verilən bəyanatlar müsbət nəticələrin əldə olunacağına işarə etmir. Çünki Kiyev hökuməti dövlətin ərazi bütövlüyünü və ya suverenliyini şübhə altına alan heç bir formulu qəbul etməyəcək. Rəsmi Moskvanın mövqeyi isə böyük müqavilənin bir hissəsi kimi, Donbasın bütün ölkələr tərəfindən Rusiya ərazisi olaraq tanınmasının təmin olunması yönündədir”.