Yunanıstan mətbuatı Türkiyənin son illərdə müdafiə və aviasiya sənayesində əldə etdiyi sürətli inkişafı və ixrac göstəricilərindəki artımı diqqət mərkəzinə alıb.

Publika.az xəbər verir ki, bu barədə “In Newspaper” nəşri “Türkiyə silahlı pilotsuz uçuş aparatlarının satışında lider mövqedə” başlıqlı məqalə dərc edib.

Bildirilib ki, Türkiyə hazırda 40-dan çox ölkəyə müdafiə məhsulları ixrac edir və qlobal silah bazarında mövqeyini getdikcə gücləndirir. Həmçinin, Türkiyənin 2025-ci ildə müdafiə və aviasiya sektorunun ixracının təxminən 50 faiz artaraq 10 milyard dolları keçdiyi qeyd olunub.

Xəbərdə xüsusilə pilotsuz uçuş aparatları sahəsində Türkiyənin ön plana çıxdığı vurğulanıb. “Baykar” şirkətinin qlobal PUA bazarında lider mövqedə olduğu, şirkətin ixrac gəlirlərinin də sürətlə artdığı bildirilir.

Təhlillərə görə, Türkiyə dünyada istifadə olunan pilotsuz uçuş aparatlarının təxminən 65 faizini təmin edir və hazırda dünyanın ən böyük 11-ci müdafiə təchizatçısı hesab olunur.

Həmçinin qeyd edilib ki, Rusiya-Ukrayna müharibəsindən sonra NATO ölkələri Türkiyəni yalnız hərbi tərəfdaş deyil, eyni zamanda müdafiə sənayesində mühüm istehsal ortağı kimi görməyə başlayıb.

Türkiyənin müdafiə sənayesində “Baykar”, “ASELSAN”, “Roketsan”, “TUSAŞ” və digər böyük şirkətlərin rolunun artdığı da vurğulanıb.