ABŞ administrasiyası Rusiyanın və Ukraynanın silahlı münaqişənin həlli üçün hansı addımların atılmalı olduğunu artıq başa düşdüyünü bəyan edib.

Globalinfo.az xəbər verir ki, bu barədə ABŞ Prezidentinin milli təhlükəsizlik üzrə köməkçisi Mayk Uolts “The National Interest” jurnalına müsahibəsində bildirib.

Onun sözlərinə görə, həftələrlə aparılan diplomatik səylər nəticəsində tərəflər arasında sülhə nail olmaq üçün lazım olan əsas məsələlərə dair ümumi anlayış formalaşıb.

“İndi Rusiya və Ukrayna sürətlə hərəkət etməli, razılaşmaya gəlməlidirlər. Əks halda Prezident Tramp səbrini itirə bilər”, – deyə Uolts qeyd edib.

Uolts keçmiş Prezident Co Baydenin Ukrayna ilə bağlı strategiyasını “qarışıq və qeyri-müəyyən” adlandırıb. Onun fikrincə, yalnız Donald Tramp Rusiya və Ukraynanı danışıqlar masasına gətirə bilərdi.

Rusiyanın xarici işlər naziri Sergey Lavrov da məsələ ilə bağlı fikirlərini bölüşüb. O, Braziliyanın “O Globo” qəzetinə müsahibəsində bildirib ki, Moskva və Vaşinqton arasında Ukrayna münaqişəsinin nizamlanması yolları üzrə dialoq davam edir.

Lavrov deyib ki, Tramp administrasiyası Baydenin rəhbərlik etdiyi hökumətdən fərqli olaraq münaqişənin “əsas səbəblərini” anlamağa çalışır. O xatırladıb ki, Tramp dəfələrlə bəyan edib: “Əgər ABŞ Ukraynanı NATO-ya sürükləməyə çalışmasaydı, bu münaqişə baş verməzdi”.