Avropa ölkələrinin arsenalında Ukrayna üçün nəzərdə tutulan hava hücumundan müdafiə (HHM) raketləri tükənib.

Teleqraf xəbər verir ki, bu barədə NATO Baş katibinin müavini Radmila Şekerinskaya Münxen Təhlükəsizlik Konfransının plenar iclasında çıxışı zamanı bildirib.

Onun sözlərinə görə, Şimali Atlantika Alyansı hazırda çatışmazlığı aradan qaldırmaq üçün bütün dünyada axtarış aparır:

"Biz Ukraynada baş verənləri görürük. NATO ölkələrinə müraciət edərək bildirdik ki, əgər əlinizdə HHM raketləri varsa, xahiş edirik, onları Ukraynaya verin. Lakin məlum oldu ki, imkanlarımız məhduddur. İndi bütün tərəfdaş ölkələrə üz tutaraq xahiş edirik: raketlərinizi Ukraynaya təhvil verin".

R.Şekerinskaya Avropa İttifaqının ayırdığı maliyyə vəsaitlərinin niyə məhz ABŞ-a yönəldiyinə də aydınlıq gətirib. O qeyd edib ki, bu, məcburiyyətdən irəli gələn addımdır:

"Hazırda yalnız Birləşmiş Ştatların əlində raket-tutucuları tədarük etmək üçün real imkanlar qalıb".