ABŞ-ın Ukraynaya döyüşmək üçün qoşun göndərmək planı yoxdur. Yens Stoltenberq də bu ölkəyə hər hansı NATO hərbçisinin göndərilməsini istisna edib.

Publika.az xəbər verir ki, bunu ABŞ Dövlət Departamentinin sözçüsü Vedant Patel Fransa prezidentinin və Avropa Şurasının rəhbərinin son bəyanatlarını şərh edərkən deyib.

“Biz çox açıq şəkildə bildirdik ki, Birləşmiş Ştatların Ukraynaya döyüşmək üçün qoşun göndərmək niyyəti yoxdur və NATO-nun baş katibi də Ukraynaya hər hansı NATO qoşunu göndərilməsini istisna edib. Biz hesab edirik ki, Putinin təcavüzünü dayandırmağın ən birbaşa və faydalı yolu Nümayəndələr Palatasının Milli Təhlükəsizlik Aktını qəbul etməsi olardı. Bununla ukraynalı tərəfdaşlarımız özlərini müdafiə etmək üçün lazım olan silah və sursata malik olacaqlar. Bu da onların cəsarətlə müdafiəni davam etdirə bilmələrini, ölkənin demokratiya və ərazi bütövlüyünü, suverenliyini müdafiə etməsini təmin edəcək”, - Vedant Patel bildirib.

Bundan əvvəl Avropa Şurasının rəhbəri Şarl Mişel və Fransa prezidenti Emmanuel Makron xəbərdarlıq etmişdilər ki, Avropaya sülh lazımdırsa, müharibəyə hazırlaşmalıdır.