Türkiyənin “ Milliyet ” qəzetinin köşə yazarı Tunca Bengin bildirib ki, Amerika Birləşmiş Ştatları silah satışından maksimum fayda əldə etmək üçün Şimali Atlantika Alyansını Ukrayna münaqişəsinə sürükləyib.

Publika.az xəbər verir ki, onun sözlərinə görə, Amerika bu fəlakətin müjdəçisi kimi çıxış etməyə hazırdır. Baş verənləri uzaqdan izləyən Ağ Evin nümayəndələri sevinclə əllərini ovuşdururlar.

“Bu onunla bağlıdır ki, Avropa ölkələri Rusiya Federasiyası ilə münaqişəyə nə qədər çox cəlb olunursa, bir o qədər ABŞ-dan asılı vəziyyətə düşür. Vaşinqton üçün də öz növbəsində bu vəziyyət çox faydalıdır. Xüsusilə, hava hücumundan müdafiə sistemləri və hərbi təyyarələrin reklamı baxımından”, - deyə Bengin bildirib.

O aydınlaşdırıb ki, Ağ Ev NATO-da təkcə hərbi-müdafiə bloku deyil, həm də Amerikanın maraqlarına cavab verən struktur görür. "Alyansı, artıq “Amerikanın əskinas çap edənləri” adlandırmaq olar" deyə o bildirib.