İsrail mətbuatında yer alan son iddialar Yaxın Şərqdə müharibənin təkcə hərbi deyil, eyni zamanda coğrafi-siyasi nəticələr doğurmağa da başladığını göstərir. Baş nazir Benyamin Netanyahunun Vaşinqton səfəri çərçivəsində İsrail ordusunun Qəzzada faktiki nəzarət etdiyi və “sarı xətt” adlandırılan bölgə ilə bağlı açıqlaması rezonans doğurub. Baş nazir sözügedən ərazini “İsrailin yeni sərhədi” kimi tanınmasını gündəmə gətirib.

Analitiklərin fikrincə, belə bir ehtimalın reallaşması Qəzza zolağının 58 faizinin de-fakto ilhaqı demək olacaq. Bu addım, mahiyyət etibarilə, Qolan Təpələrinin taleyi ilə eyni siyasi xəttin Qəzzaya tətbiqi mənasına gəlir.

Globalinfo.az-a danışan siyasi şərhçi Kənan Novruzov deyib ki, İsralin bunu asanlıqla bacarması mümkün görünmür:

“Belə bir addım ciddi beynəlxalq müqavimətlə qarşılaşacaq. Sadəcə Türkiyənin deyil, ABŞ-ın da bu məsələyə münasibəti mənfi ola bilər və böyük narazılıq yarada bilər. Rəsmi Təl-Əviv sanki bilərəkdən vəziyyəti gərginləşdirir və “suları bulandırır”. Məqsəd isə aydındır: baş nazir Benyamin Netanyahunun hakimiyyətini qoruyub saxlamaq.

Netanyahu yaxşı anlayır ki, xalqın ondan narazılığı mövcuddur və əgər ölkədəki gərginliklər azalsa, xalq onu hakimiyyətdən uzaqlaşdıra bilər. Bu baxımdan, Təl-Əvivin siyasəti həm daxili, həm də regional səviyyədə strateji bir addım kimi qiymətləndirilməlidir. Məasəd daxili siyasi dəstəyi möhkəmləndirmək, eyni zamanda xarici aktorlar qarşısında mövqeyini qorumaqdır”.