Şimali Koreya dövlət mediası ölkə lideri Kim Çen İnın nəzarəti altında iki yeni hava hücumundan müdafiə raketinin sınaqdan keçirildiyini açıqlayıb.

Globalinfo.az xəbər verir ki, Koreya Mərkəzi Xəbər Agentliyi (KCNA) silahların üstün döyüş qabiliyyətinə malik olduğunu və unikal texnologiyadan istifadə etdiyini bildirib, lakin əlavə təfərrüat paylaşmayıb.

Məlumata görə, sınaqlar pilotsuz uçuş aparatları və qanadlı raketlər də daxil olmaqla müxtəlif hava hədəflərini məhv etmək imkanlarını nümayiş etdirib.

Raket sınağı Cənubi Koreyanın, iki ölkəni ayıran Demilitarizasiya Zonasında (DMZ) qısa müddətlik sərhədi keçən Şimali Koreya əsgərlərinə xəbərdarlıq atəşi açmasından dərhal sonra baş tutub. Daha sonra hər iki ölkənin ordusu sərhədə cəmlənərək taktiki döyüş təlimləri keçirib. BMT Komandanlığının məlumatına əsasən, sərhədi 30-a yaxın Şimali Koreya hərbçisi keçib.

Pxenyan Seulu qəsdən təxribatda ittiham edib. Bundan əlavə, bölgədə ABŞ və Cənubi Koreyanın genişmiqyaslı birgə hərbi təlimlərə başladığı bildirilib.