Türkmənistan Xalq Məsləhətinin sədri Qurbanqulu Berdiməhəmmədovun Azərbaycana səfəri maraqla qarşılanıb. Bildirilir ki, səfər ölkələr arasında münasibətlərin daha da dərinləşdirilməsi və inkişaf etdirilməsi məqsədi daşıyır. İkitərəfli əlaqələrin gücləndirilməsi ilə iqtisadi, ticarət və digər sahələrdə əməkdaşlığın inkişafına əlavə stimul verəcəyi gözlənilir.

Türkmənistan liderinin Azərbaycana səfərində hədəf nədir? Bununla hansı mesajlar verilir?

Globalinfo.az-a danışan deputat Elman Nəsirov deyib ki, bu səfər ikitərəfli münasibətlər tarixində yeni bir mərhələnin başlanğıcıdır və böyük əhəmiyyət kəsb edir:

“Rəsmi Bakı-Aşqabad münasibətləri müəyyən dövrlərdə enişli-yoxuşlu olsa da, bu gün qürurla qeyd etmək olar ki, iki dövlət arasındakı əlaqələr inkişaf dinamikasına malikdir. Həm nəqliyyat və logistika, həm də enerji təhlükəsizliyi sahələrində yükdaşımalar, yaxud digər əməkdaşlıq sahələri sürətlə irəliləyir. Səfər işğaldan azad olunmuş ərazilərimizdə həyata keçirildi. Füzuli şəhərinə gedən Berdiməhəmmədov ardınca Şuşada oldu. Füzulinin ermənilər tərəfindən necə vandalizmə məruz qaldığını və onların tarixi, mədəni, dini abidələrimizi yerlə-yeksan etdiyini öz gözləri ilə gördü. Şuşadakı tarixi abidələrimiz və məscidlərimizə qarşı ermənilərin törətdiyi vəhşiliklərə şahidlik etdi. Eyni zamanda, Qarabağ və Şərqi Zəngəzurun sürətlə bərpa edildiyini, Azərbaycanın bu sahədə göstərdiyi böyük potensialı müşahidə etdi”.

Deputat qeyd edib ki, bu səfər Aşqabadın Bakının haqq işini müdafiə etdiyini göstərir:

“Berdiməhəmmədovun səfəri əlaqələrimizin daha da sürətlə inkişaf edəcəyini və keyfiyyətcə yeni bir mərhələyə daxil olduğunu göstərir. Bu kontekstdə, Türkmənistanın yaxın gələcəkdə Türk Dövlətləri Təşkilatının (TDT) tam hüquqlu üzvü olacağı mümkündür. Bütün bunlar çox vacib məqamlardır və həmçinin Ermənistana, ona dəstək verənlərə bir mesajdır: Türk dünyası birlikdədir. Berdiməhəmmədovun gəlişi bu reallığı bir daha təsdiq edir”.

Politoloq Əlimusa İbrahimov isə bildirib ki, səfər Türkmənistanın digər türk dövlətləri ilə ortaq dəyərləri və məqsədləri paylaşmaq istiqamətində atacağı addımlar baxımından əhəmiyyətlidir:

“Bu, münasibətlərin genişlənməsinə və digər çoxtərəfli məsələlərə töhfə verəcək. Türkmənistanın Türk birliyinin tərkibində olmaması Türk Dövlətləri Təşkilatını (TDT) natamam edirdi. Aşqabadın qatılması ilə bu birlik daha da güclənəcək və genişlənəcək. Azərbaycan ilə Türkmənistanın ümumi məqsədləri hər iki dövlətin iqtisadi potensialının artırılması və ticarət əlaqələrinin möhkəmləndirilməsi üzərində qurulub. Bununla yanaşı, bu münasibətlər digər qlobal və çoxtərəfli məsələlərdə də vacib rol oynayacaq. Hər iki dövlət birlikdə enerji resurslarını öz maraqlarına uyğun şəkildə yönləndirə bilərlər.

Bu münasibətlər yalnız regionda deyil, eyni zamanda qlobal səviyyədə də mühüm məsələlərin həllinə müsbət təsir göstərəcək. Türkmənistan bu gün dünyada ciddi qaz ehtiyatlarına malik və strateji əhəmiyyət daşıyan bir ölkədir. Bu ehtiyatlara, xüsusilə Avropa və digər regionlarda böyük tələbat var. İki ölkə öz güclərini birləşdirərək enerji sektorunda və qlobal səviyyədə mühüm rol oynaya biləcəklər”.