Mayın 13-də Türkiyənin Milli Təhlükəsizlik Şurasının Baş katibi Okay Məmiş və milli müdafiə naziri Yaşar Gülər Azərbaycana səfər edib. Səfər çərçivəsində Prezident İlham Əliyevlə də görüş keçirilib, mühüm məsələlər müzakirə edilib. Sözügedən vəziyyət yerli və xarici mediada xüsusilə böyük maraq doğurub.

Bu görüşlərin səbəbi nədir?

Globalinfo.az-a danışan siyasi şərhçi Əli Mustafayev bildirib ki, Türkiyədən Azərbaycana baş tutan yüksək səviyyəli səfərlər təsadüfi deyil və regional geosiyasi proseslər fonunda strateji əhəmiyyət daşıyır:

“Hazırda regionda və dünyada kifayət qədər gərginlik və qarşıdurmalar müşahidə olunur. Rusiya-Ukrayna müharibəsi, Pakistan-Hindistan arasında davam edən gərginlik və digər potensial münaqişələr Türkiyənin Azərbaycanla bağlı həssasiyyətini artırır. Bundan əlavə, Azərbaycanın İran və Rusiya ilə müəyyən qədər normal münasibətləri mövcuddur. Lakin bu münasibətlərdə bəzi gizli ziddiyyətlərin olduğu da ehtimal edilir. Türkiyənin müdafiə nazirinin və Təhlükəsizlik Şurasının baş katibinin Azərbaycana səfəri bu baxımdan qiymətləndirilməlidir. Türkiyə hər zaman Azərbaycanın təhlükəsizlik maraqlarına risk yaradan hallara qarşı həssas və diqqətlidir”.

Siyasi şərhçinin fikrincə, hazırkı şəraitdə Türkiyənin bu cür addımlar atması zəruridir:

“Son zamanlar Rusiyanın Azərbaycana qarşı müəyyən fəallıq nümayiş etdirdiyi görünür. 9 May Qələbə Paradında Azərbaycanın nümayəndə heyətinin tutduğu mövqe də ehtiyat tədbirlərinin zəruriliyini göstərir. Müdafiə qabiliyyətinin gücləndirilməsi və təhlükəsizlik sahəsində əməkdaşlığın dərinləşdirilməsi istiqamətində müzakirələrin aparılması tamamilə realdır. Türkiyə Azərbaycanın etibarlı və strateji müttəfiqidir və bu münasibətlər daim inkişaf edir”.

Globalinfo xatırladır ki, Türkiyə rəsmilərinin, xüsusilə də hərbi sahəyə rəhbərlik edən şəxslərin Bakıya intensiv səfərləri ölkə ictimaiyyətində xüsusi maraqla qarşılanır. 2020-ci ilin yayında iki qardaş ölkənin hərbçilərinin birgə təlimlərindən sonra başlayan proseslər Azərbaycan cəmiyyətində məmnunluq, özgüvən və qürur hiss yaratmışdı. Hazırkı geopolitik şərtlərdə Türkiyə hərbi və təhlükəsizlik strukturuna rəhbərlik edən yüksək vəzifəli şəxslərin səfərləri də ölkə insanında oxşar duyğuları təkrar canlandırır. Rusiyadan ölkəmizə qarşı artan siyasi aqressiv ton, Ermənistanın silahlandırılması, Zəngəzur istiqamətindəki proseslər fonunda bu səfərlərin böyük anlam və məqsəd daşıdığı haqda qənaətlər formalaşır…