Türkmən xalqının Milli Lideri, Xalq Məsləhətinin Sədri Qurbanqulu Berdiməhəmmədov Azərbaycana səfər edəcək. Məlumata görə, səfər iyunun 16-da baş tutacaq və Bakıda bir sıra rəsmi görüşlər keçiriləcək. Görüşlər zamanı ikitərəfli əlaqələrin müzakirə olunacağı bildirilir.

Berdiməhəmmədovun sürpriz səfərinin məqsədi nədir? Başqa hansı məsələlər müzakirə edilə bilər?

Globalinfo.az-a danışan politoloq Sultan Zahidov bildirib ki, Qurbanqulu Berdiməhəmmədovun Azərbaycana bu, ilk səfəri deyil:

“Azərbaycan Prezidentinin də Türkmənistana bir sıra mühüm səfərləri olub. Bu qarşılıqlı səfərlər iki ölkə arasında münasibətlərin dinamik və müsbət məcrada inkişaf etdiyini göstərir. 2017-ci ildə Azərbaycan və Türkmənistan arasında strateji tərəfdaşlıq sazişi imzalanıb. Nəqliyyat sahəsində də geniş əməkdaşlıq mövcuddur. Türkmənistan Azərbaycanın Mərkəzi Asiyaya açılan iki əsas giriş qapısından biridir. Digəri isə Qazaxıstandır. Azərbaycan isə Türkmənistan üçün Avropaya çıxış baxımından vacib tranzit ölkə rolunu oynayır.

Enerji sahəsində əməkdaşlıq da yüksələn xətt üzrə inkişaf edir. Kənd təsərrüfatı, şəhərsalma, humanitar və mədəni sahələrdə də əlaqələr getdikcə genişlənir. Bütün bunlar iki ölkə liderlərinin səfərlərinin zəruriliyini və təbii xarakter daşıdığını göstərir. Hazırda Azərbaycan və Türkmənistanın gündəliyində genişmiqyaslı əməkdaşlıq məsələləri durur və bu kontekstdə qarşılıqlı səfərlər tamamilə məntiqlidir.