İsrail-İran münaqişəsi getdikcə genişlənir və hər iki tərəfdə mülki obyektlərə, dinc əhaliyə ciddi zərər vurulması halları müşahidə olunur. Xüsusilə, İsrailin keçirdiyi əməliyyatlar zaman-zaman İranın şimal-qərb bölgələrini, əsasən azərbaycanlıların yaşadığı əraziləridəki hərbi hədəfləri də əhatə edir. Mövcud vəziyyət Azərbaycanın diqqətindən yayınmır. Rəsmi Bakı müxtəlif diplomatik kanallar vasitəsilə İsrail rəhbərliyinə azərbaycanlıların yaşadığı yaşayış məntəqələrinin hərbi hədəfə çevrilməməsi, mülki infrastruktura və dinc əhaliyə zərər verilməməsi ilə bağlı mesajlar ötürüb.

Azərbaycan dövləti istər daxildə, istərsə də sərhədlərindən kənarda yaşayan soydaşlarının təhlükəsizliyini və rifahını hər zaman prioritet hesab edib. Prezident İlham Əliyevin Səmərqənddə keçirilən Şanxay Əməkdaşlıq Təşkilatının Zirvə Toplantısında səsləndirdiyi “Biz sərhədlərimiz xaricindəki soydaşlarımızın taleyinə biganə qala bilmərik” fikri bu gün daha da aktuallaşır və rəsmi Bakının bu məsələyə yanaşmasının mahiyyətini ortaya qoyur. Bu yanaşma bir daha sübut edir ki, sərhədlərimizin hüdudlarından kənarda yaşayan milyonlarla azərbaycanlının hüquqları və təhlükəsizliyi Azərbaycanın dövlət siyasətinin əsas istiqamətlərindən biridir.

Bununla belə, Azərbaycanın bu məsələdə birbaşa deyil, dolayı diplomatik kanallarla İsrailə müraciət etməsi diqqətçəkən məqamdır. Bunun səbəbi rəsmi Bakının həm İranla, həm də İsraillə münasibətləri gərginləşdirməməyə yönəlmiş balanslı və praqmatik siyasətidir. Azərbaycan hazırkı mərhələdə İrandakı soydaşlarımızın münaqişənin qurbanına çevrilməsinə laqeyd yanaşmır. Bu yanaşmanın arxasında ciddi strateji və diplomatik səbəblər dayanır. Əgər Azərbaycan açıq şəkildə İsrailə müraciət etsə və bu ictimaiyyətə açıqlansa, İran bunu ölkə daxilindəki azərbaycanlılarla bağlı beynəlxalq təzyiq və ya təxribat kimi qələmə verə bilər. Belə bir interpretasiya isə həm İranla ikitərəfli münasibətlərdə ciddi gərginlik yarada, həm də İrandakı soydaşlarımız üçün əlavə təhlükələr doğura bilər.

Digər tərəfdən, Azərbaycan İsraillə dərin strateji tərəfdaşlığa malikdir. Bu əməkdaşlıq təkcə müdafiə sənayesi və təhlükəsizlik sahələrində deyil, həm də enerji, kənd təsərrüfatı və yüksək texnologiyalar kimi sahələrdə özünü göstərir. Rəsmi Bakı bu əlaqələri tənqid və qarşıdurma yolu ilə deyil, əməkdaşlıq və qarşılıqlı anlaşma çərçivəsində inkişaf etdirməyə çalışır. Diplomatik kanallar vasitəsilə mesajların çatdırılması bu münasibətlərə xələl gətirmədən narahatlıqların ifadə olunmasına imkan yaradır.

Nəticə olaraq, Azərbaycan İsrail–İran münaqişəsinin dinc əhaliyə, xüsusilə İrandakı soydaşlarımıza təsir etmə riski fonunda həm beynəlxalq hüquqa sadiq, həm də regional sabitliyə önəm verən bir dövlət kimi, mürəkkəb vəziyyətdə balanslı və humanist mövqe tutur. İrada yaşayan milyonlarla soydaşımızın təhlükəsizliyi təkcə mədəni və etnik məsələ deyil, dövlətçilik məsuliyyəti və milli təhlükəsizlik məsələsidir.