Son günlər beynəlxalq siyasi arenada Türkiyənin mövqeyinin gücləndiyi, münaqişələrin həlli üçün ideal platforma kimi dəyərləndirildiyi müşahidə olunur. Qlobal siyasətdə sanki Ankara ətrafında bir sıxlaşma prosesi başlayıb. Düşmən sayılanlar təşəkkür edir, sanksiya qoyanlar geri addım atır, böyük güclər Ankaraya tərəf yönəlir.

Həmçinin PKK-nın ləğvi və ABŞ-la Qərbin dəstəklədiyi PYD/YPG-yə təzyiqlərin artması kimi nüanslar Türkiyənin “terrorla mübarizə” məsələsində beynəlxalq legitimlik qazandığını göstərir. Uzun illər ərzində ABŞ və Qərb ölkələri tərəfindən dəstəklənən PYD/YPG artıq Ankaranın terror təşkilatı kimi qəbul etdiyi PKK ilə əlaqələrini kəsərək Vaşinqtona yaxınlaşma tələb edir.

Xüsusilə ABŞ-ın Türkiyəyə marağının artması, münasibətlərin yaxşılaşdırılmasına çalışılmasının səbəbi nədir? Uzun illərdir müşahidə olunan Ankara-Vaşinqton gərginliyi sona çatır?

Globalinfo.az-a danışan politoloq Turab Rzayev deyib ki, bu məsələyə daha kompleks şəkildə yanaşmaq lazımdır:

“ABŞ bir sıra məsələlərdə Türkiyənin mövqeyini nəzərə almalı, bəzən isə dəstəkləməlidir. O da həqiqətdir ki, Vaşinqton bəzən istəməsə də, Ankaranın təkliflərini qəbul edir. Bu, hər bir strateji əlaqənin kompleksliyindən irəli gəlir.

Məsələn, Ağ Ev Ukrayna münaqişəsində Rusiya ilə əlaqələri kəsib sanksiyalar tətbiq etməyə başlayanda Ankara eyni addımı atmadı. Məhz bu yanaşma, hazırda Türkiyəni danışıqlarda əhəmiyyətli bir ölkə olaraq göstərir. Rusiya, Ukrayna və ABŞ nümayəndələrinin İstanbulda bir araya gəlməsi isə Türkiyənin vasitəçilik rolunu yenidən təsdiq edir. Bu, onun bölgədə və beynəlxalq münaqişələrdə artıq strateji tərəfdaş kimi qəbul edildiyini bir daha göstərir”.

Politoloq əlavə edib ki, Türkiyə Ukraynada müharibənin davam etdiyi müddətdə yalnız bir vasitəçi kimi deyil, həm də güclü bir oyunçu olaraq önə çıxır:

“Bu vəziyyət ABŞ və Rusiya kimi qlobal oyunçuların Ankaranın vasitəçiliyini qəbul etməsi ilə daha da möhkəmlənir. Ankara Moskva ilə münasibətlərinin gərgin olduğu bir vaxtda da, həm ABŞ, həm də Rusiya ilə balanslı mövqedə qalmağa davam edib.

Türkiyənin digər bir strateji uğuru da burada açıq-aşkar görünür. ABŞ Prezidenti Donald Trump özü də etiraf edir ki, Ankaranın Suriya siyasəti uğurlu nəticələr verdi. Bu, ABŞ-ın Türkiyəyə siyasi dəstəyini artırmağa yönəlik bir addımdır. Ən maraqlısı isə, Trumpın açıq etirafından sonra Suriyaya tətbiq edilən sanksiyaların aradan qalxması məsələsidir. Burada ABŞ-ın Səudiyyə Ərəbistanı ilə münasibətləri da mühüm rol oynayır. Türkiyənin o ölkə ilə əlaqələri yeni balansların qurulmasını ehtiva edir”.