Kardioloq Yekaterina Paukova kişilərdə qəfil ürək dayanması riskinin qadınlara nisbətən daha çox olduğunu bildirib.

Milli.Az xəbər verir ki, kardioloqun fikrincə ürəyin dayanması adətən həyati təhlükə yaradan ritm pozğunluqları mədəcik taxikardiyası və mədəcik fibrilasiyası zamanı baş verir. Bu hallarda ürək çox sürətlə döyünür və qana normal təzyiq göstərə bilmir.

Kardioloq qeyd edib ki, kişilərin hormonal fonunda estrogenin az olması onları daha riskli qrup halına gətirir. Estrogen hormonu ürək və damar sistemini qorumağa kömək edir, buna görə də qadınlarda bu cür hallar nisbətən az müşahidə olunur.

Paukova əlavə edib ki, xolesterinin yüksəkliyi, siqaret çəkmə və alkoqoldan sui-istifadə də ürək dayanması riskini artırır və bu vərdişlər kişilərdə daha geniş yayılıb.

Mütəxəssis bildirib ki, 40 yaşadək kişilərdə qəfil ürək dayanması daha çox ritm pozğunluqları ilə əlaqəlidir, yaşlılarda isə bu hal çox vaxt gizli keçən işemik ürək xəstəliyi fonunda baş verir. Damar divarlarında yaranan aterosklerotik yığıntılar partladıqda qan dövranı pozulur və infarkt baş verir ki, bu da ürəyin dayanmasına səbəb ola bilər.

Həkim ürək sağlamlığını qorumaq üçün mütəmadi olaraq EKQ müayinəsi, xolesterin və qlükoza analizi aparmağı, həmçinin qan təzyiqini ildə ən azı bir dəfə ölçməyi tövsiyə edib. Təzyiq göstəriciləri 135/85 mm civə sütunundan yüksəkdirsə, kardioloqa müraciət etmək vacibdir.