Kürd Fəhlə Partiyası (PKK) yaxın vaxtlarda Türkiyəyə qarşı silahlı mübarizəni dayandırdığını və özünü ləğv etdiyini açıqlaya bilər.

Belə ki, mayın 5-dən 7-dək keçirilən PKK qurultayında təşkilatın həbsdə olan lideri Abdullah Öcalanın müraciəti müzakirə olunub. PKK qurultayda “tarixi əhəmiyyətə malik qərarlar” qəbul edildiyini və bu qərarların yaxın günlərdə – təxminən 13-14 may tarixlərində müvafiq sənədlər və izahatlarla birlikdə ictimaiyyətə açıqlanacağı bəyan edib.

Öcalan bu ilin fevral ayında müraciət ünvanlayaraq 1978-ci ildə yaratdığı bu təşkilatı silahı yerə qoymağa çağırdı. O, eyni zamanda PKK-nın Suriya və İrandakı qollarını, eləcə də İraq və Türkiyədə fəaliyyət göstərən Kürdüstan İcmaları Birliyini (KCK) də silahı yerə qoymağa və fəaliyyətlərini dayandırmağa səslədi. Mart ayında PKK rəsmi olaraq Öcalanın çağırışına əməl etdiyini açıqladı və atəşkəs elan etdi.

Türkiyənin 40 ildir mübarizə apardığı terror problemi birdəfəlik həll oluna, PKK tamamilə geri çəkilə bilərmi?

Globalinfo.az-a danışan siyasi şərhçi Kənan Novruzov bildirib ki, Suriyada Bəşər Əsəd rejiminin devrilməsi bölgədə yeni reallıqlar formalaşdırıb:

“Bu reallıqlardan biri Türkiyənin təhlükəsizlik maraqları ilə bağlıdır. Ankara uzun illərdir PKK, YPG və İŞİD kimi terror təşkilatlarının təhdidləri ilə üz-üzə qalırdı. Bəşər Əsəd hakimiyyətdə olduğu dövrdə bu terrorçularla mübarizə aparmaq Türkiyə üçün daha çətin idi. İndi isə belə bir maneə qalmayıb.

Hazırda Türkiyə bu vəziyyətdən maksimum istifadə etməyə çalışacaq. Suriyada terror fəaliyyətinin aradan qaldırılması Ankara üçün strateji əhəmiyyət daşıyır və bu istiqamətdə bütün imkanlarını səfərbər edəcək. Suriyanın müvəqqəti hökumətinin prezidenti Əhməd əl-Şaraa da böyük ehtimalla Türkiyənin mübarizəsinə dəstək verəcək. Bu, həm ölkənin bərpası prosesi üçün zəruridir, həm də prezidentin legitimliyini gücləndirəcək. Əgər əl-Şaraa Türkiyənin maraqlarını nəzərə alarsa, Ankara da öz növbəsində Dəməşqə siyasi və iqtisadi dəstək verəcək. Yəqin ki, bu istiqamətdə artıq razılıq əldə olunub.”

K.Novruzov əlavə edib ki, Türkiyənin terrorla mübarizədə davamlı nəticə əldə etməsi üçün region ölkələrinin, xüsusilə İran və İraqın dəstəyi də vacibdir:

“Zənnimcə, Ankara bu istiqamətdə də diplomatik fəaliyyətini davam etdirəcək. PKK artıq ciddi şəkildə zəifləyib. Öcalanın çağırışı və təşkilatın atəşkəs elan etməsi də bunu təsdiqləyir. Türkiyənin xarici işlər naziri Hakan Fidanın da dediyi kimi, təkcə silahı yerə qoymaq kifayət etmir. PKK qeyri-leqal təşkilat olduğunu rəsmən bəyan etməlidir. Bu, haqlı tələbdir. Əks halda, terrorçular gələcəkdə yenidən revanşa cəhd göstərə bilərlər.

PKK-nın özünü tam ləğv etməsi hələlik ehtimal daxilində olsa da, yaxın gələcəkdə baş verməyə bilər. Çünki bu, ideoloji məsələdir. Amma Türkiyənin qısa müddətdə antiterror əməliyyatlarına başlaması da istisna deyil”.