Amerikalı ixtiraçı, futuroloq, "Google"un texniki direktoru, süni intellekt üzrə mütəxəssis Rey Kurzveyl sonsuzadək yaşamaq niyyətindədir. Bəs o, bunun üçün nə edir?

Publika.az oxucuları Rey Kurzveylin sağlamlıq qaydaları ilə tanış edir.

O, kompüterin şahmat üzrə dünya çempionu üzərində qələbəsini və simsiz internetin hər yerdə yayılmasını proqnozlaşdırıb. Bütün bunlar gerçəkləşdiyinə görə, onun gələcəklə bağlı digər proqnozlarına da etibar etmək olar. Üstəlik, Kurzveyl əbədi həyatın mümkünlüyünə ciddi yanaşır, hətta buna nail olmaq üçün müfəssəl bələdçi də nəşr edib. "Longevity Clinic"in qurucusu Terri Qrossmanla birgə müəllifi olduğu "Transcend" kitabında Rey qeyd edib ölümsüzlüyə hər kəs nail olmasa da, ən azı ömrünü əhəmiyyətli dərəcədə artıra bilər. Bunun üçün alim bir proqram tərtib edib.

Kurzveylin indi 75 yaşı olsa da, sağlam, xoşbəxt və aktiv olduğunu iddia edir, lakin o, bioloji yaşının təxminən 50-yə yaxın olduğuna əmindir. O, hər gün dəyəri bir neçə min dollar olan 100-ə yaxın pəhriz əlavəsi həbi qəbul edir ki, bu da ildə 1 milyon dollara başa gəlir. Onun standart səhər yeməyi bir fincan təzə giləmeyvə, bir az qəhvə ilə isti şokolad, bir parça hisə verilmiş qızılbalıq və ya skumbriya, vanilli soya südündən, stevia (şəkər əlavəsi), yulaf sıyığı və yaşıl çaydan ibarətdir.

1. Mütəmadi olaraq bütün bədən sistemlərini müayinə edin, biokimya, şiş markerləri, hormon səviyyələri və s. üçün testlər verin. Həmçinin evdə ürək döyüntüləri, qan təzyiqi, qanda şəkərin səviyyəsi və xolesterin səviyyələri kimi əsas sağlamlıq göstəricilərini izləyin. Əzələ gücünü, elastikliyi və dözümlülüyü müəyyən etmək üçün fitness testi edin.

2. Kifayət qədər yatın, daha çox gülün, təbiətdə olun, müntəzəm olaraq meditasiya edin və həftədə ən azı bir dəfə tam bədən masajı edin.

3. Şəkərdən imtina edin, onu stevia ilə, şirniyyatları isə meyvə və giləmeyvə ilə əvəz edin. Onları səhərlər yeməyə çalışın. Heyvan zülallarından daha çox qoz-fındıq, mərcimək, paxla, göbələk kimi bitki zülallarına üstünlük verin.

4. Bir mütəxəssislə birlikdə həyat tərziniz üçün lazım olan gündəlik kalori sayını hesablayın. Masadan 80% tox qalxın, axşam 7-8-dən sonra yemək yeməyin.

5. Minimum proqram: gündəlik yarım saatlıq gəzintiyə çıxın. Mümkünsə, fiziki fəaliyyəti artırın, dartınma, isinmə, aerobika və güc məşqlərinə üstünlük verin.

6. DNT-nizi analiz edin, qocalmış hüceyrələri əvəz etmək və yeni orqanlar yaratmaq üçün istifadə oluna bilən öz kök hüceyrələrinizdən ibarət bank yaratmağa başlayın.

7. Mümkün olduqca təbii məhsullar yeyin, tərkibində toksin olan tərəvəz və meyvələrdən uzaq durun: bolqar bibəri, ispanaq, kərəviz, kartof, şaftalı, nektarin, çiyələk, alma, armud, albalı, xaricdən gətirilən üzüm, moruq. Tərkibində ən az toksin olan qidalar alın: qarğıdalı, avokado, gül kələm, qulançar, soğan, noxud, brokkoli, ananas, manqo, kivi, papaya, banan. Sarımsaq, soğan, rozmarin, limon, yaşıl çay detoksifikasiyaya kömək edir.

Yeri gəlmişkən, Reyin son fotolarına baxıb 2-3 il əvvəl çəkilmiş şəkillərlə müqayisə edəndə, insan istər-istəməz onun nəzəriyyəsinin işlədiyinə inanmağa başlayır.