Türkiyədə yeni kabinetin açıqlanmasından sonra seçkilərə gedən Yunanıstanın müvəqqəti hökuməti Türkiyənin “Yüz ilin kabineti”nə qarşı nə edəcəyini müzakirə edib.

Publika.az xəbər verir ki, yunan mətbuatı yeni xarici işlər naziri Hakan Fidan və milli müdafiə naziri Yaşar Gülərə diqqət yetirərək, bu iki adın Yunanıstanla bağlı hansı siyasət yürüdəcəyini düşünür.

Yunanıstan mediası keçmiş xarici işlər naziri Mövlud Çavuşoğlunun tez-tez qitə şelfini və hava məkanını gündəmə gətirməsinə, Yunan adalarının silahsızlaşdırılmasına, Qərbi Trakyadakı türk azlığının hüquqlarına və Yunan adalarına diqqət çəkməsini xatırladıb.

Yunan mətbuatında yer alan bir xəbərdə Türkiyənin mümkün Yunan strategiyası üçün bəzi planları müzakirə etdiyi qeyd edilib. Vurğulanır ki, Türkiyənin birinci planında adaların tərksilah edilməsi yer alır.

Xəbərdə bildirilir ki, Türkiyənin Kahramanmaraş bölgəsində baş verən zəlzələ səbəbindən iki ölkə arasında Egey dənizində keçirilən hərbi təlimlərin qarşısının alınması üçün moratorium qəbul edilsə də, bu vəziyyət çox da uzun sürməyəcək.

Bu səbəbdən ilk strategiyanın Türkiyənin bu tələbini aradan qaldırmağa yönəlməli olduğu vurğulanıb. Türkiyəni “aqressiv” olaraq xarakterizə edən mətbuat, türk ordusunun kifayət qədər güclü olduğunu və bu səbəbdən Yunanıstanın hazır olması lazım olduğunu qeyd edir.

Türkiyənin “Mavi Vətən” doktrina planının hər zaman masada olduğuna diqqət çəkən mətbuat, Ankaranın gündəminin bir müddət sonra bu planı həyata keçirmək olacağının vurğulayır.