Rusiya və Ukrayna arasında müharibə ehtimalı hər gün, hər saat artsa da, ümumi mənzərə Ukraynanın xeyrinədir.

Bunu Milli.Az-a açıqlamasında Kiyev Dünya Siyasət İnstitutunun dosenti, politoloq Yevqeni Maqda deyib.

Ukraynalı siyasi şərhçi bildirib ki, Ukraynaya edilən hərbi texnika ilə bağlı yardımlar qüvvələr balansını dəyişə bilər:

"Müharibənin baş verəcəyini böyük ehtimalla zənn etmirəm, amma rus ordusu hərbi aktivlik nümayiş etdirərək psixoloji təzyiq etməkdə davam edir.

Müharibə başlayacağı təqdirdə Rusiyanın məğlubiyyəti qaçılmaz ola bilər, Kreml üçün biabırçı məğlubiyyətlə bitə bilər. Hadisələrin gedişatı da deməyə əsas verir ki, tarixi perspektivdə Rusiya parçalanacaq və Ukraynaya qarşı təcavüz bu prosesin katalizatoruna çevriləcək.

Hava şəraiti ilə bağlı sərhəddə yaranan bataqlıqlar və xəndəklər amili də Rusiyanın hücum planına təsir edə bilər, lakin həlledici olmayacaq. Çünkü Rusiya qoşunlarını təkcə Donbasda cəmləmir, onlar Ukraynanı üç tərəfdən mühasirəyə alıb.

Bununla belə, Böyük Britaniyadan, ABŞ-dan və digər ölkələrdən Ukraynaya fasiləsiz hərbi texnika və silah tədarükü də Ukraynanın mövqeyini xeyli gücləndirir. Sərhəddəki vəziyyət (xəndək, bataqlıq) və Ukraynaya bu yardım Kremlin hesablarını alt-üst edə, qüvvələr balansını dəyişə bilər. Ukrayna hazırda da müdafiə silahları alır, bu, Rusiyanın hesablamalarından daha artıq gücə düşməyinə səbəb olacaq. Bu proses də artıq indidən rus ordusunu ruhdan salır".

Qeyd edək ki, sosial şəbəkələrdə yayılan kadırlardan da görürük ki, havanın temperaturunun yüksəlməsi Ukrayna ilə sərhəddə cəmləşmiş Rusiya qoşunlarının işini çətinləşdirməyə başlayıb. Bu görüntülərdə Rusiyaya məxsus tankların, digər hərbi texnikaların sərhəddə qarın əriməsi nəticəsində yaranan bataqlıqda batması kadrları əks olunub.