Xəbər verdiyimiz kimi, dünən Türkiyənin xarici işlər naziri Mövlud Çavuşoğlu parlamentdə çıxışı zamanı, Türkiyə və Ermənistan münasibətlərini normallaşdırmaq üçün qarşılıqlı olaraq xüsusi nümayəndələr təyin edəcəklərini açıqlayıb. O, həmçinin bildirib ki, hər addımda Azərbaycanla birlikdə hərəkət edəcəklərini də sözlərinə əlavə edib.

Ermənistanın Xarici İşlər Nazirliyinin sözçüsü Vahan Unanyan da bugünkü açıqlamasında Ermənistanın Türkiyə ilə dialoqa başlamaq üçün xüsusi nümayəndə təyin edəcəyini bəyan edib.

Mövzu ilə bağlı Redaktor.az-a danışan politoloq Cümşüd Nuriyev bildirdi ki, bu, hələlik bir təklifdir:

“Bu təkliflə ilk dəfə Türkiyənin xarici işlər naziri Mövlüd Çavuşoğlu TBMM-də çıxış edib. Bu hələlik bir təklifdir. Onun icra olunub olunmayacağı bəlli deyil. Bu nümayəndəliyin yaradılıb-yaradılmayacağı haqda konkret proqnoz vermək olmaz. Amma Türkiyə bir addım atdı və bəyan etdi ki, bu addımı Azərbaycanla birgə atacaq. İstər nümayəndəliyin açılması, istərsə də İrəvan-İstanbul çarter reyslərinin gündəmə gəlməsi daha çox Ermənistan üçün lazımdır. Siyasi cəhətdən fikirləşsək bu addım Ermənistanı çətin duruma salacaq. Ermənistan Türkiyəni ittiham edirdi. Lakin Türkiyə heç bir şərt qoymadan bu addımı atıb. Beləliklə Ermənistanın artıq əks hərəkət etmək şansı qalmadı. Bu addımı geri çevirsə, Ermənistan üçün çox ciddi siyasi nəticələrə gətirib çıxara bilər. Nəzərə alsaq ki, Ermənistan öz-özünü iqtisadi blokadaya alıb. İndi Türkiyə onlara əl uzadır”.

Politoloq bildirib ki, Türkiyədə yaşayan 200 minə yaxın ermənilərin içərisində erməni kökənli millət vəkilləri var. Onlardan bu məsələdə istifadə olunacaq:

“Türkiyə istəmir ki, Ermənistan yalançı soyqırımı ilə bağlı yaxasını cırsın. Hesab edirəm ki, Paşinyanın bunu geri çevirmək şansı çox azdır. Brüsseldə keçirilən görüşdə hansı qərarların qəbul olunmasından asılı olmayaraq Ermənistan bu təklifi geri çevirməyəcək. Onlar Avropaya çıxış istəyir. Eyni zamanda, Rusiya ilə münasibəti pozmaq istəmirlər. Bu, Ermənistanın ikitərəfli xarici siyasətidir. Yəni Türkiyə ilə yaxınlaşmaq Ermənistana daha çox lazımdır. Türkiyə 30 ilə yaxın müddətdə heç nə itirmədi, itirən Ermənistan oldu”.

Politoloq Tofiq Zülfüqarov isə hesab edir ki, bu, məntiqli qərardır:

“Hərbi baxımdan Ermənistan Türkiyə-Azərbaycan tandeminə uduzub. Onun imkanları qat-qat azdır. Artıq hərbi amil öz yerini yumşaq güc amilinə verməlidir. Burada siyasi fəallıq olmalıdır. Bu mənada gələcəkdə sərhədin açılması, nümayəndəliklərin yaradılması planları reallaşa bilər. Türkiyə tərəfi açıq şəkildə bəyan edib ki, Ermənistanla bağlı üç mövzu var. Ermənistanın ərazi iddiaları, yalançı soyqırımı mövzusu və bu mövzunun Ermənistan tərəfindən gündəmə gətirilməsi, Ermənistan-Azərbaycan münaqişəsi ilə bağlı vəziyyət. Bu üç mövzu yumşaq güc üsulunun istifadəsi ilə birbaşa bağlıdır. Yəni paralel olaraq bu mövzuların ətrafında təmaslar aparılıb. Türkiyənin tələbləri gec və ya tez öz yerini tapacaq”.