Oktyabrın 18-də Münhen hava limanı hava məkanında pilotsuz uçuş aparatları (PUA) barədə məlumatlardan sonra təcili şəkildə fəaliyyətini dayandırıb.

Publika.az xəbər verir ki, bu barədə "Associated Press" Almaniya Federal Polisinə istinadla məlumat yayıb.

Şübhəli obyektlər barədə siqnallar hava limanının təhlükəsizlik xidməti və personalı tərəfindən verilib. Obyektlər yerli vaxtla saat 22:00 radələrində yarım saat ərzində, daha sonra isə saat 23:00-da müşahidə olunub.

Üç reys başqa hava limanlarına yönləndirilib, baxmayaraq ki, onlardan ikisi sonradan Münhenə geri qayıdıb. Bir uçuş isə ləğv edilib.

Nəticədə aparılan yoxlamalar hava limanı ətrafında PUA-ların mövcudluğunu təsdiqləməyib.

Xatırladaq ki, oktyabrın 12-də Almaniya aviaşirkətləri hökumətdən hava limanları üzərindəki pilotsuz aparatlara qarşı qəti tədbirlər, o cümlədən onların məhv edilməsini tələb etmişdi.