Kişilərin reproduktiv sağlamlığı, o cümlədən potensiyası birbaşa qidalanmadan asılıdır.

Milli.Az xəbər verir ki, bunu rusiyalı Uroloq-androloloq Artur Boqatıryev söyləyib. O, kişi orqanizmi üçün xüsusilə faydalı olan beş məhsuldan danışıb.

"Düzgün qidalanma enerjinin səviyyəsinə, testosteronun istehsalına və spermanın keyfiyyətinə müsbət təsir göstərir.

Birinci yerdə midyelər dayanır. Onlar fosfor, sink, selen, yod, manqan və B qrup vitaminləri ilə zəngindir. Bu maddələr cinsi aktivliyi artırır, spermanın keyfiyyətini yaxşılaşdırır, prostatın və qan dövranının sağlamlığını dəstəkləyir.

İkinci yerdə qarabaşaq var. O, damarları möhkəmləndirən və qan dövranını yaxşılaşdıran rutin maddəsi ilə zəngindir. Bu da potensiyaya və ürək fəaliyyətinə müsbət təsir göstərir.

Kərəviz də kişilər üçün faydalı sayılır. O, qan dövranını gücləndirir, feromonların yaranmasına və androsteron hormonunun artmasına kömək edir. Bu hormon isə ereksiya və cinsi istəklə bağlıdır.

Səhəri balqabaq tumları ilə başlamaq tövsiyə olunur. Onların tərkibindəki sink və maqnezium testosteron və böyümə hormonunun istehsalını stimullaşdırır. Nəticədə potensiya, prostat sağlamlığı və ümumi enerji səviyyəsi yüksəlir.

Siyahını ispanaq tamamlayır. Bu bitki fol turşusu və azot oksidi ilə zəngindir. Hər iki maddə damarları genişləndirir və spermanın məhsuldarlığını artırır.

Mütəxəssis qeyd edib ki, bu qidaların müntəzəm qəbulu potensiyanın və ümumi sağlamlığın qorunmasına kömək edir. Lakin nəticəni saxlamaq üçün təkcə düzgün qidalanma kifayət etmir. Kişilərə siqaret və alkoqoldan uzaq durmaq, kifayət qədər yatmaq, stressdən qaçmaq və aktiv həyat tərzi saxlamaq məsləhət görülür.