Anadangəlmə ixtioz xəstəliyi autosom-resessiv gedişata malikdir və müalicəsinin doğumdan sonra ilk günlər başlanması daha məsləhətlidir. Kompleks müalicə zamanı qlükokor-tikoidlərlə, vitaminlərlə, qamma-qlobulin, antibakterial inyeksiya, anabolik müalicə vasitələri ilə yanaşı xaricə nişasta, yatıqqanqal, şalfey, dazıotu bitkisi dəmləmələri, yerli şəkildəmüxtəlif kremlər işlədilir.
Bəzən kosmetik müalicə vasitəsi kimi üz dərisinə müxtəlif tərkibli maskalar qoyulur və bu cür prosedurlardan sonra allergik reaksiyaların olması da istisna hal deyil. Allergik reaksiya zamanı qaşınma, üz dərisinin qızarması, göynəməsi kimi şikayətlər yaranır. Allergiya yaranarsa tez bir zamanda maska yuyulmalıdır. Hər hansı bir antihistamin dərman vasitəsi təyin etmək və dəriyə çobanyastığı, yatıqqanqal dəmləməsindən kompress etmək lazımdır.
Yatıqqanqal bitkisi dəmləməsinin allergiya əleyhinə aktivliyə malik olması tədqiqatçılar tərəfindən öyrənilmişdir.
Allergiya əleyhinə təsirinə görə sistemli anafilaktik şok əleyhinə yığımın tərkibinə daxil olan bu bitkinin nəzərə çarpacaq dərəcədə antianafilaktik təsiri də qeydə alınmışdır. Üçbölümlü yatıqqanqal kimi digər bir növ olan çoxyarpaq yatıqqanqal bitkisi də həm dərman bitkisi, həm də allergiyaəleyhinə aktivliyə malik vasitə kimi istifadə edilə bilər.
Yenidoğulmuşların dəri quruluğunda, diatezlərdə, kəpəklənmələri, səpkiləri aradan qaldırmaq məqsədilə müxtəlif bitkilərin dəmləmələrindən istifadə edilir.
Kəpək, kraxmal, çobanyastığı dəmləməsi, yatıqqanqal, dazıotu, şalfey kimi təbii vasitələrlə vanna etmək keratolotik və dərini yumşaldıcı təsir göstərir.

Müəllif: Firəngiz Rüstəmova
"TƏBABƏT VƏ MİFOLOGİYA: GÖRÜNƏN VƏ GÖRÜNMƏYƏN ƏLAQƏLƏR" kitabından