Koronavirus epidemiyası zamanı ən vacib profilaktik qayda əlləri tez-tez yumaqdır. Virus kontakt yolu ilə yayılır. Bu nə deməkdir?

Məlum olub ki, koronavirus səthlərdə uzun müddət ərzində yaşaya bilir. İnsan virus olan istənilən səthə (qapı dəstəkləri, ictimai nəqliyyatda tutacaqlar və s.) toxunduqdan sonra virus onun əllərinə düşür. Əgər insan bundan sonra göz, burun və ya ağzına toxunarsa, yoluxma baş verəcək. (Müşahidələr göstərir ki, insan gün ərzindən özündən asılı olmayaraq üzünə təxminən 90 dəfə (!) toxunur.) Bunun qarşısını almaq üçün mütəxəssislər insanlara əllərini tez-tez yumağı və ya sanitayzerlə dezinfeksiya etməyi tövsiyyə edirlər.

Saglamolun.az bildirir ki, su, sabun və sanitayzerlərdən müntəzəm istifadə koronavirusdan qorusa da əllərin vəziyyətinə çox mənfi təsir edir – dəri quruyur, qızarır, çatlayır.

Bunun qarşısını almaq üçün tanınmış ukraynalı həkim Evgeni Komarovskiy çox sadə və ucuz vasitəni məsləhət görüb. Bu adi ucuz vazelindir. Axşam yatmazdan qabaq əllərinizi ilıq suda bir neçə dəqiqə saxlayın, qurulayın və əllərinizə qalın qatla vazelin çəkin. Daha sonra əllərinizə pambıq əlcək taxın və belə yatın. Səhər əllərinizi tanımayacaqsınız. Həkim bunu hər axşam etməyi tövsiyyə edir.