Ötən ay Azərbaycanda bəzi ərazilərdə sürüşmə sahələri aktivləşib.

Bunu açıqlamasında Ekologiya və Təbii Sərvətlər Nazirliyinin (ETSN) Milli Geoloji Kəşfiyyat Xidmətinin geoloji planlama ekspedisiyasının rəisi Əziz Qaralov bildirib.

Onun sözlərinə görə, avqustda Bakı-Ağsu yolunun 132-156-cı kilometrliyində sürüşmə prosesi aktivləşib:

“Lokal sahələrdə uçqun prosesləri yaranıb. Şamaxı-Qaleybuğurd-Keçməddin yolunun 24-25-ci kilometrliyində yerləşən Ağsuçayda baş vermiş sel nəticəsində Keçməddin kəndinə giriş yolunda uçqun hadisəsi baş verib.

Ötən ay Lənkəran-Lerik yolunun 17-19-cu kilometrliyində uçqun-töküntü prosesləri, 27-29-cu kilometrliyində olan sürüşmə sahəsində uçqun-sürüşmə prosesinin dinamikasında aktivlik müşahidə edilib”.

Əziz Qaralov bildirib ki, Lənkəranın Gəgiran kəndində sürüşmə sahəsi olan ərazi genişlənib:

“Tükəvilə-Diryan-Gəgiran yolunun 12-ci kilometrliyində yolun hər iki çiynində çökmə-oturma prosesləri baş verib. Masallı-Yardımlı yolunun 13-15, 7-16- 24-25, 4-26-cı kilometrliyində yolboyu bir neçə yerdə uçqun-töküntü prosesləri olub”.

Nazirlik rəsmisi qeyd edib ki, Lerik-Qoşmalyan-Kəlvəz avtomobil yolunun 10-cu kilometrliyində uçqun hadisəsinin dinamikasında aktivlik olub:

“Yolun hərəkət hissəsində çökmə var. Cəlilabad-Cəngan-Soltankənd yolunda, Gədəbəy rayonunun Pirdağ sürüşmə sahəsində, Xızı-Altıağac yolunun 1-ci kilometrliyində mövcud sürüşmə sahəsində aktivlik olub”.